Njeriu i Brukselit në Tiranë ka bërë një tjetër akt legjitimimi të opozitës se re në parlament. Ambasadori Luigi Soreca, i dorëzoi Rudina Hajdarit në cilësinë e kryetares së Komisionit të Integrimit, Progres – Raportin e një dite më parë publikuar nga KE, ku për Shqipërinë jepej rekomandim pa kushte për çelje negociatash.
“Topi tani është në fushën e Këshillit që duhet të marrë një vendim. Më duhet të them që duhet t’i drejtohemi qeverisë dhe opozitës dhe gjithë palëve të tjera që të tejkalohen ndasitë dhe të mendohet për një drejtim të përbashkët për integrimin. Ndërkohë duhet punë me shtetet anëtare të BE për të shpjeguar progresin e bërë, por edhe të bindim shtetet skeptike për perspektivën evropiane të Shqipërisë”, tha Soreca.
Diplomati europian, duke iu drejtuar znj.Hajdari me Progres-Raportin në dorë, vlerësoi atë dhe komisionin që drejton, një akt ky që legjitimon jetën parlamentare me një tjetër opozitë, formësuar së fundi pas aktit të djegies së mandateve me vendim të lidershipit të PD-së dhe LSI-së.
“Jam i lumtur që komisioni do të ketë mundësi të shqyrtojë elementët e raportit. Raporti është për t’u nxjerrë detyrat dhe për t’u zbatuar më pas elementët e nevojshëm për përmbushjen e tij”, tha Soreca. /tesheshi.com/
