Bashkimi Evropian nuk ka arritur të përmbushë marrëveshjen për shpërndarjen e refugjatëve në mesin e shteteve anëtare të saj.
Rezultatet, të paraqitura në raportin e Komisionit Evropian mbi shpërndarjen e emigrantëve brenda BE-së, kanë treguar se Unioni nuk ka përmbushur ende premtimin e dhënë.
Data e skadimit të shpërndarjes së refugjatëve në BE i përket shtatorit, por sipas të dhënave të deritashme, shtetet anëtare nga numri i parashikuar prej 160 mijë emigrantësh të cilët kanë ardhur në Greqi dhe Itali, pranuan vetëm 31 mijë prej tyre.
Siç u përmend në raportin e mësipërm, Republika Çeke pranoi vetëm 12 emigrantë, ndërsa Hungaria dhe Polonia nuk pranuan asnjë.
Komisioneri i BE-së për Migracionin, Çështjet e Brendshme dhe Shtetësinë, Dimitris Avramopulos, gjatë prezantimit të raportit tha se pret që këto shtete më në fund të fillojnë të pranojnë refugjatët.
Sipas marrëveshjes së nënshkruar në vitin 2016 midis BE dhe Turqisë, nga shtetet anëtare u kërkua të pranonin 72 mijë rëfugjatë, por siç thuhet në raport, ata pranuan vetëm 11,354.
Raporti gjithashtu thekson se një marrëveshje midis Turqisë dhe BE-së paraqet një shans për t’u përballur me krizën e migracionit në Mesdheun lindor.
Në fund të raportit gjithashtu thuhet se BE-ja do të paguajë 3 miliardë euro deri në fund të vitit, të cilat ia ka premtuar Turqisë sipas marrëveshjes së lartpërmendur për emigrantët. Komisioni Evropian më parë njoftoi se deri më tani, Turqisë i janë paguar 908 milionë euro nga 3 miliardë euro të premtuara. /tesheshi.com/
