Qeveria italiane i kërkoi Komisionit Europian që të vendosë edhe Shqipërinë në tryezën e zgjidhjeve të refugjatëve duke nënkuptuar pritjen e sirianëve por dhe paratë që janë ndarë nga Brukseli.Ministrat e Jashtëm të BE-së miratuan mekanizmin e ndihmës emergjente me 700 milionë euro.
“Ne, si Itali, insistuam, që të merret përsipër angazhimi për raste të ngjashme krizash, apo fluksi në pika të tjera të kufirit të jashtëm europian. Sot flitet për Turqinë, por e njëjta vendosmëri dhe energji të dëshmohet edhe në pjesë të tjera të kufirit të jashtëm dhe ne si Itali kemi folur shprehimisht për Shqipërinë, Maqedoninë dhe Bullgarinë, sepse këto vende janë të zbuluara dhe ne morëm mbështetje për këto. Le të shohim nëse do të ketë referencë specifike për vendet apo për referencë do citohet se dëshmohet e njëjta vëmendje dhe vendosmëri për aspekte tjera në lidhje me kufirin e jashtëm”, deklaroi Sandro Gozzi, sekretar shteti për çështjet europiane në Itali.
Ministri i Jashtëm holandez, si kryesues i radhës i BE-së bëri thirrje për shkatërrimin e mafies së trafikut të klandestinëve që është bërë edhe fuqia kryesore e lëvizjes së masës së refugjatëve.
Të premten, komisioneri i BE-së për emigracionin, Avramopulos do të vizitojë Tiranën për të diskutuar për menaxhimin e krizës së migracionit dhe luftën kundër trafikut ilegal e terrorizmit. Në këto takime pritet të vendoset kuota finale për refugjatët. /tesheshi.com/
