Nis krijimi i “republikave autonome” të prokurorisë shqiptare.
Me hyrjen në fuqi të reformës në drejtësi, kryeprokurori Adriatik Llalla del zyrtarisht jashtë loje.
Mësohet se ditët e fundit ka nisur të zbatohet me përpikëri ligji i ri për prokurorinë, ku secila prokurori do të jetë autonome.
Siç mësohet, prokurorët e degëve kanë ndërprerë korrespondencat me Prokurorinë e Përgjithshme sa u takon dosjeve hetimore. Teksa deri më tani ishte Adriatik Llalla ai që vendoste për rrugët që do ndiqeshin dhe orientonte prokurorët, nuk po ndodh më kështu.
Një rast i ngjashëm është ai i hetimeve që prokurori i përgjithshëm ka hapur ndaj kreut të ILDKP, Shkëlqim Ganaj.
Sipas burimeve nga Prokuroria e Përgjithshme, kjo dosje po hetohet nga Prokuroria e Tiranës, dhe ajo ka ndërprerë korrespodencën me organin qendror të akuzës. Mësohet se e njëjta gjë po ndodh dhe me prokuroritë e tjera, ku prokurorët tani janë të pavarur në procesin e hetimeve.
Ata kanë filluar të mos pranojnë më ndikim nga krerët e tyre. Vetë ligji e ka të përcaktuar se prokurorët janë të pavarur dhe askush nuk mund të ndërhyjë në çështje. Nga ana tjetër, mësohet se Llalla ka nisur të humbasë kontrollin dhe mbi krerët e prokurorive.
Tani ata kanë filluar të fuqizohen, pasi për prokuroritë që kanë në dispozicion janë ata që vendosin dhe asnjë tjetër. Ligji e ka të përcaktuar se kryeprokurori vetëm nxjerr udhëzime të caktuara dhe është përgjegjës për miradministrimin e institucionit që drejton. Me ligjin e ri, Adriatik Llalla ka dalë jashtë funksionit, dhe kompetencat e tij i kanë kaluar Këshillit të Lartë të Prokurorisë. Ky i fundit vendos për çdo emërim apo transferim prokurorësh.
Mungesa e Këshillit të Lartë të Prokurorisë dhe e Prokurorisë Speciale e ka futur në ngërç prokurorinë. Së pari nuk po plotësohen dot vendet vakante. Pak kohë më parë, prokuroria hapi vende vakante për prokurorë, si dhe për drejtues dhe zëvendësdrejtues në Prokuroritë e Rrethit Korçë, Elbasan, Durrës, Tiranë. Por emërimet në to janë bllokuar për shkak të KLP-së. Është ky organ që bën emërimet, dhe Prokuroria e Përgjithshme nuk bën dot asnjë lëvizje. Kjo sjell ngërç dhe me dosjet hetimore. Ngërçi më i madh ka të bëjë sidomos me hetimin e zyrtarëve të lartë. Shumë dosje janë në kompetencë të Prokurorisë së Përgjithshme, por kësaj të fundit i është hequr kompetenca dhe, për pasojë, hetimet e mjaft zyrtarëve kanë ngelur pezull.
Por ngërçi më i madh ka të bëjë me inspektimet. Aktualisht është Ministria e Drejtësisë ajo që i bën inspektimet, mirëpo kjo kompetencë i është hequr, pasi do jetë Inspektori i Lartë i Drejtësisë që do t’i kryejë ato. Aktualisht, nëse një prokuror apo edhe gjyqtar kryen shkelje, nuk mund të merret dot asnjë masë. Shkak është vonesa me KLGJ-në dhe KLP-në, që duhej të ishin ngritur tashmë. /tesheshi.com/
