Nis në Kuvendin e Shqipërisë, beteja finale e palëve politike për të bindur mbi draftin e tyre për reformën në drejtësi.
Ka nisur prej mëngjesit mbledhja e Komisionit të Reformës në Drejtësi, ku në një shfaqje direkte televizive palët po diskutojmë mbi draftin e hartuar nga ekspertët.
Një prej bashkëhartuesve të draftit, eksperti Sokol Sadushi tha se janë ndjekur opinionet e Venecias.
“Lidhur me pozicionin e prokurorit të përgjithshëm dhe strukturës së posaçme për veprat antikorrupsion kemi përcaktuar një marrëdhënie më të qartë. Ndërkohë edhe mekanizmi i zgjedhjes së prokurorit të përgjithshëm ka gjetur vend në Kushtetutë. Sa i përket çështjes së vlerësimit të gjyqtarëve dhe prokurorëve mendoj se kemi gjetur një zgjidhje që kënaq Venecian në atë çfarë ka rekomanduar”, tha Sadushi.
Ndërkaq Unioni i prokurorëve ka kundërshtuar thuajse të gjtiha pikat e draftit për prokurorinë.
Unioni i prokurorëve ka dërguar një rezolutë në Komisionin e Posaçëm për draftin e reformës në drejtësi, ku kërkon në mënyrë të qartë që reforma në sistemin e drejtësisë të këtë si synim kryesor përmirësimin dhe ndryshimin e sistemit dhe jo të emrave të përvecëm.
“Parashikimi i nenit 179/2/b i ndryshimeve kushtetuese është një parashikim që le vend për diskutime dhe konsiderohet jo i drejtë.
Ky nen parashikon se vetëm gjyqtarët dhe prokurorët në detyrë (të emërtuara SUBJEKTE nga kjo dispozitë) do të konsiderohen të EMËRUAR vetëm pas kalimit të vlerësimit dhe rivlerësimit nga KPK. Ky parashikim dëmton rëndë sistemin aktual në një kohë që gjyqtarët dhe prokurorët janë në detyrë dhe perfaqesojnë interesat e shtetit shqiptar nëpërmjet vendimeve përkatese”, theksohet në rezolutë.
/tesheshi.com/
