Ilir Meta ka bërë një lëvizje të fuqishme me mbërritjen nga Shtetet e Bashkuara të Amerikës, duke rritur “stekën” e votave të LSI-së për reformën në Drejtësi.
Pasi ka thirrur në një takim të paprecedent kreun e opozitës, Lulzim Basha, duke marrë rolin e një protagonist dhe negociatori, Meta ka goditur fort Edi Ramën në pikën qmë të gjuajtur për momentin: Saimir Tahirin.
Ministrin e Brendshëm që Meta kërkon ta largojë prej kohësh, e ka sulmuar sot fuqishëm publikisht, duke u prononcuar për herë të parë mbi të ashtëquajturin “skandal të përgjimeve”.
Kreu i Kuvendit ka kundërshtuar ashpër akuzat e Tahirit dhe Ramës ndaj gjyqtarit Arjan Aliaj që pezulloi kreun e Policisë Haki Çako, por edhe sulmin ndaj prokurorisë.
“Për fat të mirë s’kam qenë këtu dhe s’doja të dëgjoja akuza mes institucioneve. Shteti i së drejtës duhet të triumfojë në çdo rast. Mbështes pavarësinë ndaj institucioneve dhe respektimin e ligjit. Institucionet duhet të bashkëpunojnë”, tha Meta.
Duke qenë se në këtë moment ai është mjaft i domosdoshëm me 20 votat e tij pas refuzimit të Lulzim Bashës për të miratuar reformën, kreu i LSI-së ka rritur “pazarin” duke kërkuar diçka më të madhe.
Ndaj po i gjuan Edi Ramës aty ku i dhemb më shumë, tek Saimir Tahiri. Nëse vërtetë nuk mund të marrë “kokën” e ministrit, ai kërkon një “trofe” tjetër të madh. Dhe nisur nga ambicjet dhe fjalët që ka hapur, mund të jetë një “plaçkë” më e madhe në mandatin e dytë qeverisës.
Vetëm një muaj më pare, në mediat pranë tij doli version i Ilir Metës-Kryeminisër.
E gjithë kjo lëvizje bëhet kur kreu i qeverisë ndodhet në Francë për kombëtaren e futbollit, ndërsa Basha me Berishën janë në Berlin të thirrur nga qeveria gjermane para vizitës së ministrit të jashtëm Frank-VValter Steinmeier më 14 qershor. /tesheshi.com/
