Ndërsa në Britani po shtohet gjithnjë e më shumë ankthi dhe ndasitë për të ardhmen brenda apo jashtë Bashkimit Europian, publiku europian, siç sugjeron një sondazh i fundit, mbetet habitshëm i patrazuar nga perspektiva e një Brexit.
Sondazhi me të paktën 10 mijë e 992 qytetarë europianë, realizuar nga fondacioni gjerman Bertelsmann tregon se ndërsa një shumicë dërrmuese e europianëve kontinentalë të të gjitha grupeve moshore janë në favor të qëndrimit të Britanisë si anëtare e Bashkimit Europian, por mbështetja nuk është kushedi se çfarë, por vetëm 54 për qind.
Shumica e europianëve në 28 vendet anëtare thonë se besojnë se largimi i Britanisë do të ketë fare pak ose aspak ndikim në vendin e tyre, e vetëm 25 për qind shprehin pikëpamjen se vendi i tyre do të jetë më keq pa Britaninë në BE.
Ndërsa sondazhi është realizuar në muajin prill, që do të thotë përpara se çështja Brexit të dominonte median në shumë vende, komentet më të fundit nga politikanë të profilit të lartë në kontinenent kanë të njëjtën qasje gjakftohtë sa i takon një largimi të mundshëm të Britanisë nga BE.
Kancelari austriak, Christian Kern tha për “Guardian” pak ditë më parë se ai po e priste rezultatin e referendumit të 23 qershorit “me një lloj qetësie” pasi besonte se reformat fondamentale janë të nevojshme sido që të jetë rezultati, ndërsa ministri gjerman i Financave, Wolfgang Schäuble ka komentuar se “Europa do të punojë edhe pa Britaninë nëse kjo është e nevojshme”.
Menaxherja e projektit të Bertelsmann, Isabell Hoffmann thekson: “Ajo që kemi parë në sondazhet tona është se ndërsa në Britani gjendja shpirtërore është e irrituar dhe ka trazira, atmosfera në kontinent ka qenë relativisht e qetë. Përgjigja bazike që kemi parë është se njerëzit në pjesën tjetër të Europës nuk janë trazuar vërtet nga debati Brexit”.
Sondazhi sugjeron gjithashtu se vizioni i sekretarit britanik të Drejtësisë, Michael Gove se dalja britanike nga Bashkimi Europian do të japë shkëndijat e një “çlirimi demokratik të të gjithë kontinentit”, sipas të dhënave nuk është aspak realist.
Referendumet në BE për anëtarësinë, siç tregon sondazhi, do të prodhonin një votë në shumicë pro qëndrimit në gjashtë shtetet më të mëdha të BE-së, përveçse në Britaninë e Madhe. Në Francë dhe në Itali, pjesa e atyre që thonë se do të votonin për të qëndruar në BE është relativisht e vakët me 52 dhe 54 për qind respektivisht, ndërsa 62 për qind e gjermanëve dhe 74 për qind e qytetarëve spanjollë të anketuar thonë se do të votonin për të qëndruar në BE.
Sondazhi i Bertelsmann ravijëzon një panoramë në kontrast të sjelljes kontinentale ndaj Bashkimit Europian në krahasim me një tjetër studim të publikuar në fillim të muajit.
Sondazhi i kryer nga qendra e kërkimeve Pew me bazë në Uashington tregoi një rënie të thellë të mbështetjes publike për BE përgjatë gjithë vendeve anëtare gjatë vitit të kaluar.
Vetëm 38 për qind e të pyeturve në Francë thanë se kishin një pikëpamje të favorshme për BE-në, me një rënie prej 17 për qind krahasimisht me vitin e kaluar. Mbështetja për BE në Spanjë ra me 16 pikë e në Gjermani me 8 pikë, ndërsa në Britani me shtatë pikë.
Por, në lidhje me çështjen e integrimit europian, në të dyja studimet duket një sjellje më pozitive nga sa pritej. Bertelsmann gjeti se një shumicë prej 59 për qind e të anketuarve thanë se do të preferonin një integrim më të madh politik dhe ekonomik dhe vetëm 24 për qind thanë se preferonin më pak integrim.
Britania e Madhe përbën përjashtim në këtë drejtim, me vetëm 31 për qind që thanë se do të donin të shihnin më shumë integrim, krahasuar me 59 për qind në Gjermani, 71 për qind në Itali dhe 78 për qind në Spanjë.
Studimi i Pew– “Euroskepticizmi përtej Brexit” – gjeti se pikëpamja se “një pjesë e pushtetit duhet të rikthehen tek qeveritë kombëtare” ishte në minorancë në të gjitha vendet e vëzhguara, përveçse në Greqi dhe në Britaninë e Madhe. Në të gjitha vendet e tjera anëtare, shumica tha se ndarja aktuale e pushtetit duhet të mbetet e njëjtë ose duhet t’i transferohet më shumë pushtet Brukselit.
Përgatiti: Juli Prifti – /tesheshi.com/
