Benzema, Bale e Ronaldo treguan edhe një herë se mund të gjunjëzojnë çdo skuadër nëse luajnë të tre bashkë e janë në formë.
Tre golat e parë të Realit të Madridit në takimin e së dielës ndaj Seviljes mbajnë firmën e këtyre tre lojtarëve, në një prej paraqitjeve më të mira sezonale. I menduar si një takim i vështirë, 90 minutat kanë kaluar më lehtë se ç’pritej. Fitoren e thellë 4-0 do ta plotësonte goli i shënuar nga Jese pak para fundit të lojës.
Rezultati do të kishte qenë dhe më i thellë nëse Ronaldo do ta shndërronte në gol një 11-metërsh të gjuajtur në minutën e 58-të. Nuk duhet harruar gjithashtu forma vazhdueshmërisht e shkëlqyer e portierit madrilen Keilor Navas, që edhe mbrëmë spikati me pritjet, posaçërisht të një penalltie në minutën e 27-të.
Zinedine Zidane, trajneri i Realit, e ka pëlqyer mjaft lojën e skuadrës së tij ndaj Seviljes. “Jam shumë i lumtur me mënyrën si shkoi loja, nga minuta e parë e gjer në fërshëllimën e fundit. Luajtëm një nga ndeshjet më të mira të sezonit,” ka thënë ai pas takimit.
Ai nuk ka lënë pa përmendur dhe treshen e sulmit, përcaktuese në fitoren e thellë: “Kjo është hera e tretë që kemi patur BBC-në, dhe është shumë e rëndësishme t’i kesh të gjithë lojtarët të gatshëm për të luajtur.”
Këtë të shtunë vjen dhe klasikja. Reali i Madridit do të luajë ndaj Barcelonës në “Camp Nou”. /tesheshi.com/
