Reali i Madridit ndërpreu rrugëtimin në Kupën e Mbretit në Spanjë, pasi pagoi çmimin e një humbjeje 1-2 në shtëpi një javë më herët ndaj Selta Vigos.
Barazimi 2-2 në ndeshjen e dytë nuk vlejti për asgjë, ndërsa duhej medoemos fitorja për të shpresuar në kalimin në gjysmëfinale.
Eliminimi është rezultat i një momenti jo të mirë për Realin, që pësoi dy humbje të njëpasnjëshme gjatë këtij muaji.
E megjithatë, pavarësisht eliminimit të mbrëmshëm, Zinedine Zidane, trajneri i Realit, është shfaqur optimist, duke mos pranuar të fajësojë askënd për dështimin.
“Ne kemi dy veprimtari të tjera, dhe do të luftojmë gjer në fund për t’i fituar ato. Duhet të mendojmë për kampionatin dhe për Ligën e Kampionëve. Kjo ndeshje i përket tashmë së shkuarës, dhe ne kemi një ndeshje të rëndësishme të dielën, në një tjetër veprimtari.”
Për teknikun francez, paraqitja e lojtarëve të tij nuk ka të sharë.
“Nëse luajmë kështu, me karakter dhe personalitet, do të vazhdojmë të bëjmë përpara. Nuk u dorëzuam dhe bëmë një ndeshje të madhe gjer në fund.”
Ndërkohë që Alavesi qe kualifikuar të martën, të mërkurën, veç Selta Vigos, e siguroi kualifikimin dhe Atletiko e Madridit, që barazoi 2-2 në fushën e Eibarit, me takimin e parë të fituar 3-0.
Nga përballja e sotme, Barcelona – Real Sociedad, do të dalë dhe ekipi i katërt gjysmëfinalist i Kupës së Mbretit. Katalanasit kanë fituar 0-1 në sfidën e shtatë ditëve më parë. /tesheshi.com/
