Me tetë takimet e së mërkurës u mbyll faza në grupe e Champions League-s. Ashtu si në ndeshjet e së martës, nuk munguan dhe mbrëmë fitoret e thella, siç pati ngjashëm vetëm një barazim pa gola.
Sfida më interesante qe ajo mes Realit të Madridit dhe Borusias së Dortmundit, dy ekipeve të kualifikuara prej kohësh në grupin F. Ashtu si më 27 shtator, edhe përballja e dytë mes tyre ka përfunduar 2-2.
Të zotët e shtëpisë kanë kryesuar 2-0 pas golave të shënuar nga Benzema, një në pjesën e parë e një në të dytën. Gjermanët janë përgjigjur në gjysmëorëshin e fundit të lojës me golat e Aubameyang-ut dhe Reus-it.
Barazimi e mbajti Borusian në vend të parë në këtë grup, ndërsa Reali u rendit i dyti.
Legia e Varshavës qe skuadra që pësoi humbjet më të thella në fazën në grupe, por ia doli gjithsesi të zërë një vend të tretë në grupin F, për të kaluar në Europa League. Polakët fituan 1-0 ndaj Sportingut të Lisbonës, një fitore që u mundësoi të renditeshin para skuadrës portugeze.
Fitorja më e thellë e mbrëmjes u regjistrua në Portugali, ku Porto mposhti 5-0 Lestër Sitin.
Anglezët e kishin të garantuar kalimin e grupit, prandaj kishin zgjedhur të luanin me një formacion me shumë ndryshime nga ai klasiku. Sidoqoftë, humbja i hoqi Lestërit shkëlqimin në ndeshjet e Champions League-s.
Lestër Siti dhe Porto janë të kualifikuarat e grupit G, ku vendin e tretë e zuri Kopenhageni, që fitoi në transfertë 0-2 ndaj Bryzhit. Për belgët qe një paraqitje katastrofike, pasi nuk morën qoftë dhe një pikë të vetme në gjashtë ndeshje.
Bajer Leverkuseni fitoi 3-0 ndaj Monakos në grupin E, por suksesi nuk ndryshoi asgjë në renditje: Monako u kualifikua si e para e grupit, ndërsa Bajer Leverkuseni e siguroi kualifikimin me vendin e dytë. Ngushëllimi i vetëm për Totenhemin do të jetë pjesëmarrja më tutje në Ligën e Europës. Anglezët e mbyllën fazën në grupe me fitoren 3-1 ndaj CSKA-së së Moskës.
Në grupin H, Sevilja bëri atë që duhej, barazoi pa gola në Francë ndaj Lionit, dhe garantoi kualifikimin. Ndaj Dinamos së Zagrebit, skuadrës që nuk shënoi asnjë gol të vetëm në tërë takimet, Juventusi nuk e pati të vështirë të fitonte 2-0. Kampionët e Italisë u renditën të parët në këtë grup. Lioni do të luajë më tej në Europa League. /tesheshi.com/
