Pas një zemërimi të hapur të Turqisë për shfaqjen e trupave amerikane në Rakka me shenjat dalluese të YPG-së në veshjet e tyre, ka ardhur reagimi nga pala tjetër.
Trupat amerikanë janë urdhëruar t’i heqin emblemat e Njësive të Mbrojtjes Popullore, YPG-së, duke e quajtur veprimin të paautorizuar dhe të papërshtashëm.
Një zëdhënës ushtarak i SHBA-ve, koloneli Steve Warren, deklaroi ditën e djeshme për gazetarët: “Vënia e shenjave të YPG-së ishte e paautorizuar dhe e papërshtatshme, e është ndërmarrë veprim rregullues.”
Për të shtuar, “Kemi komunikuar si me partnerët tanë ushtarakë, ashtu dhe me aleatët ushtarakë në rajon.”
Një raportues i Al Jazeera-s nga Uashingtoni do të bënte me dije se ushtria amerikane po ndërmerrte hapa të atypëratyshëm në përpjekje për të mënjanuar atë çka mund të kthehej në një incident diplomatik.
Ministri i Jashtëm turk do ta quante të papranueshme mbajtjen e shenjave dalluese të YPG-së nga trupat amerikane, duke e cilësuar si hipokrit qëndrimin e aleatit përtej oqeanit. /tesheshi.com/
