Ministria e Jashtme turke ka reaguar ndaj deklaratave të ministrit grek të Mbrojtjes mbi presidentin Erdogan.
Për dikasterin turk, ministrit Panos Kammenos i mungon kapaciteti për t’i vlerësuar zhvillimet me gjykim të shëndoshë.
“Ne e kthejmë mbrapsht njëlloj deklaratën e bërë kundër presidentit të Turqisë, Rexhep Tajjip Erdogan, më 1 dhjetor nga ministri i Mbrojtjes Kombëtare të Greqisë, të cilin e dimë se i mungon kapaciteti i vlerësimit dhe i shprehjes së zhvillimeve me një gjykim të shëndoshë,” thuhet në reagimin e Ministrisë së Jashtme turke.
“Qëndrimi i ministrit të Mbrojtjes Kombëtare, i cili e humbi ndjenjën e gjykimit në një mënyrë të tillë sa të shpërblejë së fundi organizatat e lidhura me EOKA-në, të përfshira në akte dhune dhe terrorizmi në Qipro, dëmton përpjekjet e bashkëpunimit që jemi munduar të zhvillojmë midis dy vendeve,” lexohet po ashtu në të njëjtin reagim.
Në fund, ministrit grek të Mbrojtjes, që nuk i kurseu si Turqinë dhe Shqipërinë në deklaratat e tij aspak të pranueshme, i bëhet thirrje të sillet në përputhje me seriozitetin dhe përgjegjësinë shtetërore.
“Ne përsëri i bëjmë thirrje ministrit të Mbrojtjes Kammenos të shmangë tani e tutje deklarata dhe veprime të ngjashme, duke vepruar në përputhje me seriozitetin dhe përgjegjësinë shtetërore.” /tesheshi.com/
