Nga Blendi Gashi
Shteti i Kosovës dita-ditës po e tregon veten si burracak. Nga njëra anë i tregon dhëmbët opozitës, por nga ana tjetër poshtërohet paq prej strukturave serbe në Veri. Çdo ditë raportohen raste dhe incidente se si serbët e Veriut bëjnë ligjin atje, pa u hyrë gjemb në këmbë. De fakto, Veriu është në duart e tyre. Rasti më flagrant ishte ai i paradisaditëve me ministrin e Financave, Avdullah Hoti, të cilin serbët e kthyen mbrapsht, pa mundur të shkojë për inspektim në pikën kufitare në Jarinjë të Zubin Potokut.
Se policia nuk mund të intervenojë njëjtë në gjithë territorin e vendit, e ka pranuar edhe ministri i Brendshëm, Skënder Hyseni në një konferencë për media.
“Duhet pranuar që për shkak të ndjeshmërisë politike, policia nuk intervenon dot njësoj në tërë Kosovën”, ka deklaruar Hyseni, kur është pyetur nga mediat, se pse nuk ka vepruar policia njëjtë edhe në Veri si në kryeqytet.
Eksperti i sigurisë, Hajrullah Tërnava, në një prononcim për tesheshi.com ka thënë se është e vërtetë se Policia e Kosovës në veri të Mitrovicës nuk ndërmerr masat e parapara me ligj të intervenimit ndaj protestuesve serb.
Ai, deklaratat e ministrit Hyseni i sheh si politike që kanë për qëllim zbutjen dhe mbulimin e moskontrollit (moszbatimit) të kompetencave ndaj asaj pjese të policies.
“Ministri Skënder Hyseni është dashur që të ndërmerr masa ndaj eprorëve (shkarkim nga detyra), për arsye se nuk i kanë ndërmarrë masat ligjore për lirimin e rrugëtimit të ministrit Hoti, në mënyrë që të fillojë njëherë e përgjithmonë zbatimi (jetësimi) ligjor i kompetencave ligjore. Vërehet se MPB nuk ka kompetenca për ta shtrirë juridiksionin në tërë territorin e Kosovës”, ka deklaruar Tërnava.
Jakup Krasniqi, kryetar i Këshillit Kombëtar të NISMA-s për Kosovën, thotë se ministri Skënder Hyseni, pa fije turpi deklaroi se qeveria e Kosovës, përkatësisht ministria që drejton ai, ajo e Punëve të Brendshme dhe Policia e Kosovës nuk guxojnë të veprojnë në Mitrovicën përtej urës. 
“Kjo do të thotë se shteti ynë nuk ka sovranitet në një pjesë të tij. Aty ku ka sovranitet Vulini, për shkakun e të cilit dënohen policët që mbrojtën shtetin. Për paradoks, ministri nuk ditka për këtë rast?! Ministër se jo mahi!”, ka deklaruar Krasniqi.
KMDLNJ: Policia shkeli ligjin me mosintervenimin në Veri
Mosintervenimi i policisë në Veri është cilësuar si shkelje e ligjit nga Këshilli për Mbrojtjen e të Drejtave dhe Lirive të Njeriut.
“KMDLNj konstaton se në këtë rast kemi shkelje flagrante të ligjit dhe zbatim të standardeve të dyfishta ku policia diku (në jug) përdor edhe dhunë për zbatim të ligjit, ndërsa në veri të Kosovës (rasti Hoti), policia e Kosovës, jo që nuk e zbaton ligjin por rreshtohet në anën e ekstremistëve dhe dhunuesve të ligjit duke e penguar lirinë e lëvizjes dhe sigurinë fizike të autoriteteve të larta shtetërore. Për këtë arsye, KMDLNj kërkon përgjegjësi nga Ministria për Punë të Brendshme që lejuan dhe toleruan këtë veprim të ekstremistëve serb dhe policëve të “Policisë së Kosovës” që bashkëpunuan me ta duke e pamundësuar vizitën e ministrit Hoti në këtë pjesë të Kosovës. Me këtë rast kemi mospërfillje dhe dhunim të parimit kushtetues: “se të gjithë janë të barabartë para ligjit”, ka deklaruar KMDLNJ. /tesheshi.com/
