Nga Blendi Gashi
Thirrja e tubimeve me nxënës të shkollave të mesme të Prishtinës nga Lëvizja Vetëvendosje, konkretisht një diskutim i mbajtur dje nga ish kryetari i VV-së Albin Kurti me nxënësit në objektin e shkollës fillore “Faik Konica”, në Prishtinë për të debatuar për gjendjen politike në vend, ka bërë që të reagojnë ashpër deputetë të Kuvendit të Kosovës, Ministria e Arsimit dhe Këshilli i Prindërve të Kosovës.
Të gjithë njëzëri kanë bërë thirrje që politika të mos i fusë duart në shkolla dhe nxënësit e fëmijët të mos përdoren për aktivitete politike.
Deputetja e Partisë Demokratike të Kosovës, (PDK) Blerta Deliu-Kodra, ngriti e para në Parlament çështjen e aktiviteteve të Vetëvendosje-s të cilët po mbajnë tubime politike në shkolla për çka tha se kjo lëvizje po vepron në kundërshtim me ligjin.
“Mbajtja e tubimeve politike është në kundërshtim të plotë me nenet dhe ligjet e Kuvendit të Republikës së Kosovës, është politizim, Vetvëvendosje me këtë aktivitet ka shkel ligjin për arsimin parauniversitar.
Me çfarë të drejte mund të keqpërdoren fëmijët dhe nxënësit tanë. Duhet të ndalen këto praktika nga VV, dhe i drejtohem edhe ministrit të Arsimit dhe Ministrisë së Administrimit dhe Pushtetit Lokal se Komuna e Prishtinës ka shkelur në mënyrë flagrate këtë ligj”, ka thënë Deliu, duke shtuar se me këtë gjë Vetëvendosje po manipulon me nxënësit.
MASHT nis inspektimet rreth tubimeve politike në shkolla
Edhe Arsim Bajrami, minsitër i Arsimit u bëri apel të gjitha komunave dhe partive të shmnagin çdo aktivitet që ndërhyn në shkolla.
“Kemi bërë apel të gjitha komunave dhe parive politike që të shmangin cilindo aktivitet që cenojnë ligjin për arsimin dhe integritetin e fëmijëve. Nga sot kemi aktivizuar inspektorët e arsimit që të takohen me drejtorët e shkollave që të mos lejojnë mbajtjen e këtyre aktiviteteve të paligjshme ”, ka thënë Bajrami
Reagon edhe Këshilli i Prindërve: Të mos përdoren nxënësit për aktivitete politike
Ndaj tubimeve të VV-së me nxënës ka reaguar edhe Këshilli i Arsimit të Prindërve të Kosovës që thotë se ndjehen tejet të shqetësuar me tendencat e liderëve politikë dhe të partive politike për politizimin e shkollave dhe përdorimin e nxënësve dhe fëmijëve për aktivitete politike apo organizime të ndryshme jashtë plan-programit të hartuar nga organet legjitime arsimore të Kosovës.
“Andaj nëpërmes kësaj komunikate për media Këshilli i Prindërve të Kosovës u bën apel Ministrisë së Arsimit Shkencës dhe Teknologjisë së Kosovës, kryetarëve të komunave të Kosovës, drejtorëve të drejtorive komunale të arsimit në të gjitha komunat e Kosovës, inspektorëve arsimorë, drejtorëve të shkollave, prindërve e në veçanti liderëve të subjekteve politike që një gjë e tillë mos të lejohet dhe shkollat ta ruajnë pavarësinë dhe neutralitetin politik e kurrsesi të shndërrohen në poligone të militantëve politikë”, thuhet në reagimin e kryetarit të Këshillit të Arsimit të Prindërve të Kosovës, Bajram Berisha.
Më tej në reagim thuhet se askush nuk ka të drejtë të cenojë lirinë e mësimit dhe edukimit të fëmijëve tonë dhe askush nuk ka të drejtë të përdorë fëmijët për kurrfarë interesi personal, grupor, politik, fetar apo çfarëdo aktiviteti tjetër që bie në kundërshtim me Ligjin për Arsimin Parauniversitar të Kosovës dhe ligjet e konventat e tjera ndërkombëtare për të drejtat e fëmijëve, thuhet në fund të reagimit të KPK.
Edhe kryetari i Sindikatës së Bashkuar të Arsimit, Shkencës dhe Kulturës së Kosovës (SBASHK), Rrahman Jasharaj, e ka quajtur shqetësuese thirrjen e tubimeve të tilla duke thënë se nxënësit nuk duhen të ngarkohen me politikë.
“Ne edhe në takim me ministrin kemi kërkuar që shkolla të mbahet larg politikës. Asnjë lider politik, asnjë parti nuk duhet të organizojë tubime të tilla”, ka thënë Jasharaj, për mediat kosovare.
Ndryshe, të martën, lidhur me paralajmërimet për mbajtjen e këtyre debateve ka reaguar edhe Lidhja Demokratike e Kosovës, e cila ka akuzuar kryetarin e Prishtinës Shpend Ahmeti se po lejon që Vetëvendosje të organizojë debate politike në shkollat publike të Prishtinës.
