Fjalimi i fundit i ish kryeministrit Nikolla Gruevskit dhe kërkesa e tij ndaj faktorit ndërkombëtar, gjegjësisht ambasadorit të SHBA-ve, Xhes Bejli që të qëndroj(n)ë në kornizat e mandatit dhe mos përzihe(n)t në punët e brendshme të Maqedonisë, ka shastisur si opinionin e gjërë ashtu edhe partitë apo analistë politikë.
Këtë fjalim kreu i VMRO-së, e mbajti disa ditë pas zgjedhjeve dhe para qindra përkrahësve dhe militantëve të partisë së tij që po protestojnë tek Komisionit Shtetëror të Zgjedhjeve, duke kërkuar nga ky institucion çertifikimin e fitores në zgjedhjet e 11 dhjetorit.
Kjo pasi ai i druhet një skeme ndërkombëtare për të mos e lejuar më që të rivijë në pushtet.
Nisur nga kjo, Lëvizja BESA e dënon ashpër vokabularin e përdorur të Gruevskit, duke gjykuar se ajo gjuhë e shpie shtetin në fragmentime mbi vija etnike, sepse shqiptarët e Maqedonisë nuk do të lejojnë në asnjë mënyrë që ndonjë politikan i papërgjegjshëm, siç është ai, t’i shkëpusë nga agjenda euro-atlantike. Prandaj, ai duhet ta dijë se, nëse dëshiron të kultivojë një agjendë tjetër, atje mund të shkojë vetëm me Ali Ahmetin, por jo edhe me shqiptarët e Maqedonisë.
“Me këtë rast, kur këto ditë në Shkup janë paraqitur në skenë përsëri piromanët e vitit 1999, Lëvizja BESA u bën thirrje të gjithë shqiptarëve të Maqedonisë që të jenë të kujdesshëm dhe mos të lejojnë që dikush t’i përdorë shqiptarët si mish për top për agjendat e tyre. Qytetarët duhet ta ruajnë gjakftohtësinë, ngaqë çdo trazire eventuale i shkon për shtati Nikolla Gruevskit, shpurës së tij, si dhe vasalëve të tij shqiptarë”, thonë nga Lëvizja BESA.
Po ashtu, kjo retorikë sipas Lëvizjes BESA ka çuar në thellimin e krizës.
“Regresi i Maqedonisë në rrugën Euroatlantike është pasqyrë e qëndrimeve të Gruevskit dhe ithtarëve të tij që e frikësojnë popullin me skenarë të errëta. Mendoj se ditëve që vijnë, VMRO-DPMNE do ta rrisë këtë retorikë kundër faktorit ndërkombëtarë, megjithatë fundi i regjimit po vjen. Sa më i lartë toni i zërit të Gruevskit dhe kërkimi i fajtorit nga ana e tij, kur dihet se fajtori numër një për krizën është vet ai, është tregues se Gruevski po i numëron ditët e fundit të karrierës politike. Përkundër kësaj, jam i sigurt që populli nuk do ta merr parasysh retorikën e VMRO-së, sepse e dinë që faktori ndërkombëtarë ka bërë shumë deri më tani për Republikën e Maqedonisë”, kështu përfundon reagimi i Lëvizjes BESA.
Ndërkaq, sipas politikologut Xhenis Sulimani, thirrjet e djeshme ultranacionaliste dhe antiperëndimore përballë KSHZ-së nga kryetari i VMRO-DPMNE-së, Nikolla Gruevski, dëshmojnë edhe orientimin më të saktë politik të VMRO DPMNE-së si parti, por edhe të qeverisë që ai ka drejtuar bashkë me BDI-në.
“Partia e njeriut që qeverisi deri më tani, i prirë nga politika diskriminuese dhe përjashtuese ndaj shqiptarëve, me gjuhën e përdorur ndaj ambasadorëve të shteteve mike, siç është gjuha e përdorur ndaj ambasadorëve të SHBA-ve dhe të BE-së, dëshmon se Nikolla Gruevski është orientuar në politika që më së paku kanë për qëllim të ardhmen e ndritur të qytetarëve dhe perspektivën e tyre euroatlantike”, deklaroi për portalin tesheshi, Xhenis Sulimani.
Mensur Krasniqi – /tesheshi.com/
