Një grua britanike e quajtur Nicola Bulley, 45 vjeçe, u zhduk të premten e kaluar teksa ecte me qenin e saj në një park në Wyre, Lancashire, dhe rasti është edhe më misterioz pasi deri më sot nuk është gjetur asnjë gjurmë e vetme, sikur të ishte avulluar.
Dyshimi i parë i policisë ka qenë se ajo ka rënë aksidentalisht në lumin aty pranë dhe është mbytur, por edhe pas kontrollit të djeshëm në shtratin e lumit me aparatin më modern të hidrolokatorit, gruaja nuk është gjetur. Gjëja më e çuditshme është se celulari i saj u gjet në stol dhe se një videotakim ishte ende i ndezur, shkruan Daily Mail.
Një ekspert zhytjeje i përfshirë në kërkim tha të martën në mëngjes se nëse nuk gjendet në lumë sot, ajo nuk është aty dhe “ndoshta ka një palë të tretë të përfshirë”.
Siç raportohet, eksperti i mjekësisë ligjore Peter Faulding, ekipi i të cilit iu bashkua kërkimit dje, tha se ai kurrë nuk kishte parë një rast kaq të pazakontë në 20 vitet e punës së tij në këtë fushë. “Thjesht nuk e dimë, aktualisht jemi duke kërkuar për një person të padukshëm dhe nuk e kemi idenë se ku ndodhet”.
Ai shtoi se “instinkti” i thotë se zonja Bulley nuk është në ujë dhe se ai ka frikë se celulari është lënë si “karrem” për të çuar policinë në drejtimin e gabuar të kërkimit. Një nga arsyet pse dyshohet rënia e saj në ujë është se qeni po priste pranë stolit dhe ishte tërësisht i tharë, gjë që është e pazakontë nëse do të dëshmonte mbytjen e pronares së tij.
Nicola bëri shëtitjen e saj të fundit përgjatë shtegut pyjor për në lumin Wyre në orën 8:43 të mëngjesit pasi la dy fëmijët e saj në shkollë. Shtatë minuta më vonë ajo u takua nga një i njohur me një qen, i cili më vonë tregoi se si Nicola po ecte në livadhin e poshtëm me spanielin e saj të quajtur Willow.
Dëshmitari tha se dy qentë e tyre shkurt “përshëndetën” njëri-tjetrin para se të ndaheshin përgjatë lumit. Në 8:53 Nicola i dërgoi një e-mail shefit të saj në Exclusively Mortgages. Më pas ajo mori pjesë në një videotakim pune në orën 9:01 të mëngjesit dhe u pa 9 minuta më vonë në livadhin e sipërm duke ecur. Policia njoftoi se në orën 9:30 përfundoi videotakimi i punës, por Nicola nuk u shkëput dhe qëndroi aktive. Rreth orës 9:35 celulari i saj dhe Willow u gjetën në një stol buzë lumit, por nuk kishte asnjë shenjë prej saj.
Partneri i Nicole, Paul Ansell, u tha hetuesve se ajo nuk kishte armiq dhe nuk po përndiqej nga askush. Sipas tij, çdo gjë ka qenë krejtësisht normale ditën që ajo u largua.
I dërrmuar nga kjo ndodhi, ai tha: “Ne kemi dy vajza të vogla të cilave u mungon dëshpërimisht mamaja e tyre dhe kanë nevojë për kthimin e saj. Nëse dikush ka ndonjë informacion që mund të ndihmojë në gjetjen e Nicole, unë do t’i bëj thirrje që të kontaktojnë policinë dhe na ndihmojë”.
Babai i Nicola-s, Ernest, tha për mediat britanike se vajza e tij ishte një person pozitiv, pa asnjë problem mendor dhe se kishte frikë se dikush e kishte rrëmbyer.
“Ne i trembemi mendimit se mos nuk e shohim më kurrë”, tha ai. /tesheshi.com/
