Presidenti turk Rexhep Tajip Erdogan tha se kishte vendosur të merrte pjesë në çerekfinalet e Euro 2024 në Berlin pas një grindjeje për festimin e golit të futbollistit turk Demiral duke shfaqur simbolin “ujqërit gri” në fillim të kësaj jave.
“A pyet dikush pse fanella gjermane ka një shqiponjë, apo fanella franceze një gjel? Merih (Demiral) tregoi emocionin e tij me atë gjest,” tha Erdogan të enjten, 4 korrik, gjatë një fluturimi nga Kazakistani.
Merih Demiral është pezulluar me dy ndeshje nga UEFA për simbolin politik të “ujqërve gri” që ai shfaqi pas fitores së ekipit të tij ndaj Austrisë në raundin e 16-të të martën (2 korrik).
Turqia takohet me Holandën këtë të shtunë, më 6 korrik, në çerekfinale në stadiumin Olimpik të Berlinit, shkruan Reuters. /tesheshi.com/
