Nga Blendi Gashi
Rashit Qalaj është emëruar drejtor i Përgjithshëm i Policisë së Kosovës, i cili prej vitesh mbajti pozitën e drejtorit të Departamentit të Operacioneve. Ai këtë detyrë e mori pas largimit të Shpend Maxhunit në Agjencinë Kosovare të Intelegjencës si kryespiun.
Qalaj, me të marrë detyrën ka deklaruar për mediat kosovare se do të punojë në shërbim të sigurisë së qytetarëve.
Në këtë shkrim nuk do merremi se ç’punë konkrete ka bërë Qalaj si drejtor i Departamentit të Operacioneve në polici, por me sfidat që u ballafaqua sa udhëhoqi këtë detyrë, konkretisht me përplasjet me opozitën që kishte gjatë kohës së protestave në vitet 2016-2017.
Emërimi i Qalajt në këtë pozitë më së shumti do ta nervozojë Vetëvendosjen e Albin Kurtit, e cila e konsideron njeri të PDK-së.
Ndërsa Vetëvendosje ishte e bashkuar, figura të saj gjatë protesta hodhën jo pak akuza në drejtim të Qalajt për lidhje me pushtetin.
Më 13 janar të 2016-ës, atëkohë, anëtari i Këshillit të përgjithshëm të Vetëvendosjes, Mirsad Shkreta, gjatë një konferencë për media prezantoi një fotografi në të cilën shihen deputeti aktual i PDK-së, Elmi Reçica duke drekuar me Rashit Qalajn.
“Duke mos lënë hapësirë të mendimit se Vetëvendosja ka vetëm retorikë, ne këtu para jush (para gazetarëve) e kemi një foto e cila flet saktë për bashkëpunimin e policisë në strukturat politike. Këtu në foto është Rashit Qala i cili është drejtor i departamentit operacional në policinë e Kosovës dhe shihet qartë që është në darkë me deputetin Elmi Reçica, i cili njihet si njeri shumë i fuqishëm i SHIK-ut. Normalisht që ky është mysafir në vilën luksoze të deputeti Reçica dhe sigurisht merr direktiva se si të shtypë dhe të propagandojë kundër opozitës dhe kundër veprimeve të tyre, që në fakt janë legjitime dhe të drejta”, deklaroi para më shumë se dy vitsh Shkreta.
Se Qalaj është mik i deputetit Reçica e tha në konferencën e 13 prillit të 2017-tës edhe ish-sekretari i Vetëvendosjes Daradan Molliqaj, tani deputet i Partisë Socialdemoktate (PSD), por akuzoi edhe babain e Qalajt si bashkëpunëtorë të Millosheviçit.
“Rashit Qalaj, drejtori i Departamentit të Operacioneve është miku i Elmi Reçicës, babai i të cilit ka qenë pjesë e partisë së Millosheviqit, SPS, kurse ky vetë (Qalaj) ka banesë në kompaninë “Beni Dona”, e cila merr tenderë prej mijëra eurosh nga policia”, deklaroi Molliqaj
Vetëvendosje, edhe më 7 maj të 2017-tës u morr me Qalajn, ku përmes një konference paraqitën siç thanë një kërcënim me jetë që vëllai i këtij të fundit bëri ndaj Dardan Molliqaj.
“Kam met faru me shka ki të gjallë. Ki m’i ra pishman që je gjallë dhe se këtë punë kam mi zgjidh sipas Kanunit”, citoi në konferencë deputetja Albulena Haxhiu, kërcënimin e bërë.
Haxhiu më tej tha se kërcënuesi ia ka bërë me dije Molliqajt se janë duke e përcjellë vazhdimisht, madje ia kanë treguar disa nga detajet ditore.
Por drejtori i sapozgjedhur i policisë, Qalaj atë kohë tha se nuk është në dijeni për kërcënimin e pretenduar.
“Vëllai im jeton në Gjermani. Nuk e di se a është kërcënuar z. Molliqaj nga vëllai im (edhe pse e kam lexuar në portale dy javë më parë për një komunikim me ‘Facebook’)”, deklaroi Qalaj për mediat.
Ndaj emërimit të Qalajt në krye të policisë ka reaguar ish-vetëvendosësi Dardan Molliqaj, i cili e quan person të përfshirë në krimet e “Klanit Pronto”.
“Kjo është dëshmia më e qartë që çdo qeverisje me PDK-në përfundon në kthetërat e SHIK-ut. Shteti po vazhdon të mbahet i kapur e i kriminalizuar dhe nuk do të çlirohet pa dërgimin e PDK-së në opozitë dhe ‘Klanit Pronto’ në burg”, shkruan Molliqaj në Facebook. /tesheshi.com/
