Një raport diplomatik po qarkullon prej fillimit të javës në mjediset ndërkombëtare në Tiranë, ku theksohet se në mars janë parashikuar trazira të fuqishme në kryeqytet.
Raporti thekson se pas vizitës së Sekretarit Amerikan të Shtetit John Kerry në Tiranë, 14 shkurtin e shkuar, forca centrifugale janë zgjuar dhe po shtojnë presionin për të rrëzuar reformën në drejtësi.
Raporti thekson se ka lëvizje paralele edhe nga shtete të tjera, të interesuara që Shqipëria të tregojë hapa prapa dhe të krijojë paralelizëm për destabilizim edhe me Kosovën.
Siç bëhet e ditur, një indicje e fortë në këtë aspekt është rezistenca e atyre që cilësohen si “kundërshtarët e reformës në drejtësi”.
Dokumenti, një pjesë të së cilit e bëri të ditur një burim i rëndësishëm diplomatik, thekson se ish-Kryeministri Sali Berisha, Kryetari i Kuvendit Ilir Meta dhe disa politikanë të rëndësishëm brenda Partisë Socialiste kanë bërë gati rrëzimin e Edi Ramës në mars, pikërisht kur është vënë afati për të miratuar reformën në drejtësi.
Flitet se ka edhe lëvizje financiare nga qarqe të rëndësishme ekonomike që janë trazuar nga masat e Edi Ramës, por edhe nga lëvizjet proatlantike në vendet fqinje si Mal i Zi dhe Maqedoni.
Vendimi i fundit i Partisë Demokratike për të bojkotuar Kuvendin komentohet si një instrument për të ulur kuorumin e Kuvendit në seancat fatale të fillimit të pranverës.
Ndërkaq, raporti thekson se jo më kot opozita kërkon që disa deputetë të mazhorancës që kontrollohen nga Rama janë kërkuar të largohen duke i hequr Edi Ramës mundësitë e arritjes së votave të duhura me një pjesë të opozitës për të kaluar reformën në drejtësi.
Në ndërmjetësimin e ambasadorit amerikan dhe asaj të BE-së është arritur të grumbullohet një numër deputetësh nga të dyja krahët për të arritur numrin e 94 votave edhe nëse Meta do të bëjë rezistencë për reformën në drejtësi.
Ndërkaq, dokumenti thekson se “Kryeministrit i është gjetur pika e dobët duke i kërkuar largimin e deputetit Armando Prenga, i cili është liruar nga gjykata dhe mund të marrë pjesë në Kuvend, por edhe deputetëve Koço Kokëdhima, Valentina Leskaj dhe Rakip Suli.
Kjo kërkohet për ta lënë kryetarin e PD-së vetëm. Ndërkaq, brenda PS-së, Ben Blushi, Arta Dade, Namik Kopliku dhe Mimoza Hafizi janë shpallur si rivalë të Ramës dhe ka gjasa të votojnë kundër Reformës në Drejtësi. Ndërkohë disa të ashtuquajtur “senatorë” të tjerë janë të pakënaqur nga Kryeministri. Raporti thekson se edhe kryetari i grupit të PS-së, Gramoz Ruçi nuk është shumë entuziast për qeverisjen e PS-së.
Gjithashtu në dokument theksohet se Rama u ka përmendur ndërkombëtarëve se do ta çojë vendin në zgjedhje të parakohshme në mars, nëse do të ketë rezistencë për reformën në drejtësi. Kjo masë ekstreme e ka zënë në panik si Berishën ashtu edhe Metën, por edhe oponentët e Ramës brenda PS-së, ndaj ka gjasa që pas kësaj Berisha të kërkojë bojkotimin e zgjedhjeve nga ana e opozitës, gjë që mund ta ndjekë edhe aleati tjetër i Ramës që me vendimin për ballafaqim elektoral do të ndante përfundimisht aleancën qeverisëse./tesheshi.com/
