Ish-ministrja e Integrimit, Klajda Gjosha, ka reaguar ndaj raportit të OSBE/ODIHR, në lidhje me zgjedhjet parlamentare të 25 qershorit.
Në një koment në rrjetet sociale, ish-ministrja e Integrimit, e ka ballafaquar këtë raport me fjalët e kryeministrit Edi Rama se këto ishin zgjedhjet më të mira që ka pasur vendi, ndërkohë ku në raport thuhej se problem për t’u zgjidhur është “shitblerja e votës”.
“Sapo është bërë publik raporti i OSBE-ODHIR për zgjedhjet e qershorit 2017. Nuk e di sa vend ka tek dëgjuam kryeministrin për të vrapuar dhe për të na treguar se këto ishin zgjedhjet më të mira që ka pasur Shqipëria. Nuk e di të qash apo të qeshësh!
Lexoja mes rreshtave të raportit por gjithçka rrotullohej mes parregullsive në zgjedhje, rekomandimeve të pafundme për gjetjen e një mekanizmi për parandalimin e shitblerjes së votës si dhe marrjen e masave për të ndaluar presionin e jashtëzakonshëm që i është bërë administratës publike për votën e lirë!
27 vite demokraci dhe qytetarët shqiptarë ende janë në përpjekjet e tyre për të votuar të lirë, në përpjekjet e tyre që ankandi i votës të mos marrë më peng jetën e fëmijëve të tyre.
Po fatkeqësisht çfarë do lloj reforme zgjedhore të ndërmarrim ne, do të duhej më parë të ndryshonim mentalitetin politik i cili mendon se paraja mund të blej cdo gjë, se presioni që vjen si koncept diktatorial nuk shkon më ne Shqipërinë europiane te 2017-tës!
Mesa duket mentalitetet nuk ndryshojnë as me marrëveshjet e errësirës që gjoja do t’i jepnin Shqipërisë një standard tjetër!”, shkruan Gjosha në rrjetet sociale. /tesheshi.com/
