Takimi i djeshëm i Task-Force për kanabisin nën drejtimin e Edi Ramës, ka hapur polemika dhe diskutime në qarqe të ndryshme në lidhje me atë që drejtori i përgjithshëm i Policisë Haki Çako, foli mbi eleminimin thuajse total të mbjelljes, kultivimit por edhe trafikimit të kanabisit.
Një luftë që u duk se “sa hap e mbyll” sytë u fitua ndërkohë që disa muaj më parë flitej për një emergjencë kanabisi, ku nëpër shpella u gjetën tonalata të grumbulluara dhe të magazinuara.
Pyetjet që vijnë spontanisht nga ajo mbledhje e kryeministrit janë: kush e lejoi përhapjen e kanabisit pas operacionit të supersuksesshëm në Lazarat? Kush janë ato punonjës policie që nuk raportuan, apo bënë pazare me kultivuesit e kanabisit? Si kalonte kanabisi për shitja nga kultivuesi tek shitësi dhe më pas jashtë Shqipërisë? Ku është shitur jashtë Shqipërisë dhe ku u investuan paratë?
Të gjitha diheshin dhe ekzistonin përveç të tjerash edhe raporte të brendshme të disa institucioneve vendore dhe ndërkombëtare por është fakt se goditja u dha vetëm në dimrin e këtij viti.
Një burim i tesheshi.com në organet e larta ligjzbatuese të vendit, bën të ditur se në Shqipëri ekziston prej vitesh një grup oficerësh kontakti nga vendet e BE-së, grup që drejtohet nga një zyrtar i rëndësishëm i policisë gjermane.
Ky grup koordinohet nga ambasadorja e BE-së në Tiranë, Romana Vlahutin.
Ky grupim ka punuar ngushtë me policinë shqiptare për çështjen e kanabisit, sidomos për të sinjalizuar autoritetet portuale apo kufitare për nisjen e sasive të drogës.
Kjo “Task Force” Ndërkombëtare mblidhte një raport konstant mbi vijimësinë e kultivimit dhe trafikimit të kanabis sativas në Shqipëri, por edhe lidhjen e trafikantëve me zyrtarë të Policisë së Shtetit, të cilët mbyllën sytë madje edhe bashkëpunonin me njerëz të narkotrafikut.
Raporti ishte baza e leximit të autoriteteve të larta të Bashkimit Europian, të cilët i kanë paraqitur një dosje të plotë Edi Ramës, pikërisht pasi u arrit të hetohej apo të skanohej çdo zyrtar i qeverisë së policisë.
Ky raport ka qenë “derdhja e gotës” ku toleranca ndaj kanabisit nuk mund të mbante më.
Siç mësohet materiali flet me raste, emra por edhe para dhe investime të industrisë së hashashit në tregun e brendshëm dhe atë të jashtëm.
Dosja e gjatë dhe e plotë flet për kalime të një sasie të madhe parash në tregun e pasurive të patundshme, kryesisht në Tiranë dhe qytetet bregdetare si Tiranë, Durrës, Sarandë etj.
Pikërisht në këtë fazë ka nisur identifikimi i të gjitha investimeve kapitale që janë kryer me paratë e hashashit.
Dhe ajo që foli Edi Rama mbi sekuestrimin e aseteve, ka të bëjë pikërisht me këtë material që ndodhet në dorën e tij.
Është identifikuar një sasi e rëndësishme investimesh kapitale në ndërtim që nuk bëhet fjalë për blerje apartamentesh, por investime për ndërtime pallatesh. Pikërisht këto asete janë të parat në listë që pritet të sekuestrohen, ndërsa pas tyre vijnë apartamentet e blera me lekët e hashashit.
Drejtoria e Pastrimit të parave, ka nisur një skanim, nëpërmjet informacioneve të policisë të njerëzve që kanë blerë apartamente nga shitja e hashashit.
Këta persona gjenden mjaft lehtë, nëpërmjet listës së sjellë nga policia si kultivues, të cilët janë vërtetuar në hipotekë si blerës pasurish të patundshme.
Por edhe këtu ka nisur prej dy vitesh një operacion masiv shitjesh pronash nga njerëzit që kanë blerë apartamentet nga shitja e hashashit të kultivuar në sasira jo të mëdha.
Vetëm në harkun qershor 2015, qershor 2016 Tirana ka qenë epiqendra e një lëvizje marramendëse kapitali pikërisht nga shitblerja e pronave të fituara nga shitja e kanabisit.
Ky operacion i ka dhënë një hov të madh tregut imobilar por edhe ka rritur çmimet e apartamenteve që mbaheshin të ngrira në Tiranë që prej vitit 2008 kur nisi kriza.
Siç mësohet, raporti ndërkombëtar, në analizën e tij theksonte se pikërisht rreziku i madh është që kur të përfundonte operacioni i shitësve të vegjël të kultivuesve të hashashit, do të nisë një spekulim i madh financiar në vend, që mund të shtojë ofertën e ndërtimeve të mëdha, si pasojë e rritjes së kërkesës.
Dhe realisht në Tiranë, ka nisur një rritje e konsiderushme e kërkesës për apartamente, kësaj radhe jo në Unazën e Re, të Zona e Freskut apo Yzberisht, por në pjesët e qendrës së Tiranës, ku çmimi i shitjes i kalon 1800 euro për metër katror.
Vetë bashkia ka dhënë një hov të madh lejesh ndërtimi.
Të cilat në pjesën më të madhe janë nisur nga kompanitë e njohura në këtë fushë, por ndërkombëtarët dyshojnë dhe kërkojnë që në këtë treg, pra në ndërtim duhet hetuar se pikërisht me çmimet e larta të shitjes mund të operohet me injektimin e parave të mëdha të trafikantëve të hashashit.
Ky natyrisht që do të jetë një proçes kompleks që nëse nis do të shkaktojë ndoshta një traumë apo goditje në tregun e ndërtimit, por që do të japë një shenjë të madhe në dorën e shtetit për të mos lënë që paraja e pisët të bëhet pjesë e sistemit.
A do të ndërhyjë shteti? Rama foli dje për sekuestrime, por që tani nga fjalët priten fakte konkrete. /tesheshi.com/
