Drejtori i institutit “Atomi”, Jusuf Thaçi ka njoftuar se ka mbledhur 3 mijë nënshkrime të qytetarëve për të shpëtuar dhe ruajtur kompleksin e familjes Jashari në Prekaz.
Thaçi bën të ditur se këto nënshkrime ia ka drejtuar qeverisë së Kosovës, Agjencisë për Menaxhimin e Komplekseve Memoriale të Kosovës dhe Komisionin Parlamentar për Bujqësi, Pylltari, Zhvillim Rural, Mjedis e Planifikim Hapësinor të Kuvendit të Republikës së Kosovës.
“Në kuadër të nismës për shpëtimin dhe ruajtjen e Kompleksit të Familjes Jashari, pasi janë arritur mbi 3 mijë nënshkrime të qytetarëve që e kanë nënshkruar peticionin online drejtuar Qeverisë së Republikës së Kosovës për ‘Për shpëtimin dhe ruajtjen e Kompleksit të Familjes Jashari’, si qytetar i Kosovës dhe në emër të të gjithë qytetarëve që e ndajnë këtë shqetësim, sot i kam drejtuar kërkesë, përmes postës dhe përmes e-mailit (përmbajtjet dhe dëshmitë janë të bashkëngjitura në këtë postim) tri institucioneve që kanë përgjegjësi dhe kompetenca për ta adresuar dhe për ta zgjidhur këtë problem: 1. Qeverisë së Republikës së Kosovës, 2. Agjencisë për Menaxhimin e Komplekseve Memorialë të Kosovës, dhe 3. Komisionin Parlamentar për Bujqësi, Pylltari, Zhvillim Rural, Mjedis e Planifikim Hapësinor të Kuvendit të Republikës së Kosovës”, shkruan Thaçi në Facebook.
Tutje Thaçi shkruan se nëse këto institucione nuk ndërmarrin masa, atëherë personalisht (por edhe shumë qytetarë të tjerë) do të mbeten aktiv derisa të arrihet një zgjidhje afatgjate për Kompleksin e Familjes Jashari.
Kompleksi memorial Adem Jashari ka filluar të dëmtohet dhe rrezikon të shembet. /tesheshi.com/
