Lideri i Aleancës për Ardhmërinë e Kosovës, Ramush Haradinaj, përmes Facebookut ka njoftuar se i ka shkruar një letër kryetares së vendit Atifete Jahjaga lidhur me atë që ai quan “shkeljet kriminale të komisionit shtetëror të kufirit me Malin e zi” duke kërkuar për këtë komisionin edhe hetime ndërkombëtare.
Haradinaj ka thënë se angazhimi i Komisionit ndërkombëtar për demarkacionin nuk ka sjellë asnjë rezultat.
Letra e plotë e Haradinajt dërguar Jahjagës
E nderuara zonja Presidente Jahjaga,
Angazhimi i ekspertëve ndërkombëtarë në një proces që ka premisa kriminale, u dëshmua se nuk mund të prodhojë asnjë rezultat.
Ekspertët ndërkombëtarë, të caktuar prej jush për ta vlerësuar punën e Komisionit Shtetërorë për Demarkacionin me Malin e Zi, nuk kanë mundur të zbulojnë mashtrimet ordinere të nivelit ballkanik, që i kanë bërë anëtarët e këtij Komisioni.
Gjithë procesi i shënimit të kufirit me Malin e Zi, përpara se të jetë një çështje juridike ndërkombëtare, është një problem i brendshëm, dhe është e domosdoshme që ai t’i nënshtrohet një hetimi të hollësishëm ndërkombëtar. Është e pamundur që ekspertë me profil diplomatësh, profesorësh dhe polici kufitar, të zbulojnë atë që mund ta zbulojnë vetëm hetuesit kriminalë me përvojë.
Prandaj unë kërkoj nga Ju, që zyrtarisht të kërkoni një hetim ndërkombëtar, për anëtarët e Komisionit Shtetëror të Kufirit, që do të kryhej nga Byroja Federale e Hetimeve (FBI), në mënyrë që të zbardhet e vërteta për rolin kriminal që e kanë pasur anëtarët e këtij Komisioni në procesin e Demarkacionit.
Pikënisja e zgjidhjes së kësaj çështjeje, është vetëm një hetim i plotë i brendshëm i këtij procesi dhe akterëve që u identifikuan me të.
