Në një takim me të rinj në Laprakë, kryeministri Rama shpjegoi filozofinë e qeverisjes së PS-së, që sipas tij është ajo e rrugës së gjatë e të vështirë të reformave.
“Jam këtu për t’u thënë se kjo botë është e atyre që dhe kur rrëzohesh ringrihen dhe vazhdojnë të ngjitën.
Kjo botë nuk ka qenë kurrë e atyre që gjejnë rrugën më të shkurtër, siç na mëson populli kur thotë se ‘rruga e shkurtër të nxjerr më gjatë’. Shqiptarët e provuan se kur donin t’i binin shkurt me Haxhi Qamilin apo me Suden dhe i ranë më gjatë. Kjo që ofrojmë ne është rruga e gjatë, por është ajo që na çon në majë”, tha Rama.
I pari i qeverisje shpjegoi dhe ikjet e të rinjve sot, se nga çfarë joshen, por që ku përfundojnë.
“Sot shumë të rinë shikojnë në Instagram bashkëmoshatarë me Benz, avion privat e vila, e duan atë që shohin dhe menjëherë edhe nisen, ikin.
Por është shumë e dhimbshme, kur një i ri largohet dhe ndërkohë nuk e ka as zanatin për të përballuar jetën atje, as përgatitjen për t’u përballur me çfarë e pret atje dhe bien pre e atyre që i marrin të rinjtë e i fusin në shtëpitë e barit në Holandë, i trajtojnë si skllevër.
Unë nuk dua që të rinjtë të mos ikin, por të zgjedhin dhe nëse vendosin të ikin, të jenë të armatosur me një zanat dhe atje të jenë shqiptarët që dinë të ofrojnë një shërbim dhe jo ata që bien pre e lloj-lloj duarve të zeza dhe i nxihet jeta, por për të bërë këtë duhet shumë kohë dhe shumë punë”, u shpreh Rama. /tesheshi.com/
