Edi Rama ka zbatuar pikë për pikë aneksin e marrëveshjes me Lulzim Bashën për të pezulluar të gjitha kontratat, tenderat apo koncensionet qeveritare deri më 25 qershor.
Një vendim i qeverisë marrë në mbledhjen e kësaj jave, bën të ditur se autoritetet dhe titullarët e dikastereve ndalohen që të ndërmarrin firmosjen apo incimin e ndonjë tenderi apo prokurimi publik, përveçse për raste urgjente, siç janë ato të shëndetësisë apo emergjencave civile.
Aq me shpejtësi është marrë ky akt qeveritar, sa ka një gafë trashanike në formulim.
Në vend që të shkruajë “titullarët e institucioneve marrin masa që të mos iniciojnë procedura prokurimi”, vendimi thotë të kundërtën, pra “që titullarët e institucioneve marrin masa të iniciojnë procedura prokurim”.
Por pavarësisht lapsusit në formulim, vendimi ka filluar të zbatohet. Të gjitha institucionet publike kanë pezulluar plotësisht tenderat dhe prokurimet duke kryer vetëm shpenzimet emergjente, ndërkohë që vendimi i zbardhur është tërhequr për korrigjim. /tesheshi.com/
