Automjeti i tipit Mercedes për të cilën u përfol edhe në përgjimet e publikuara nga LSDM iu prezantua publikut me lejen e Ministrit të Nrendshëm Oliver Spasovski. Benzi që buxhetit të shtetit i kushtoi rreth 600 mijë euro ishte e mbuluar nga pluhuri dhe e dëmtuar në disa vende.
“Atë që e premtova si ministër teknik, sot e po e bëj. Thash se sa të bëhem ministër menjëherë do ta tregojmë mercedesin i cili ka kushtuar rreth 600 mijë euro. Pyetëm se çfarë është ajo e cila kushtoi aq shumë dhe e cila paraqet luks, kur nga ana tjetër shumë punëtorë nuk kanë pasur as uniforma, as monitor e klima në vendet e tyre të punës. Sot po ua tregojmë opinionit, kështu e gjetëm, kështu e lamë. Kjo është lënë në mënyrë shumë të papërgjegjshme dhe prandaj shihni se si duket brenda”, tha Spasovksi.
Ajo duket e dëmtuar në sipërfaqe, ndërsa nga MPB thonë se riparimi do të kushtojë mbi 20 mijë euro.
Për herë të fundit, me këtë automjet eci kryetari i Këshillit Evropian DonaldTusk, i cili erdhi më 3 prill në vilën “Vodno”. Sipas ministrit Spasovski, Mercedesi nuk do të shitet, por do të mbahet për t’u pritur e përcjellë delegacionet e jashtme.
Prokuroria Speciale në janar të këtij viti hapi procedurë hetuese nën emrin “Tanku”, ku po hetohen keqpërdorime eventuale në procedurën për blerjen e Mercedesit nga ana e Ministrisë së Punëve të Brendshme. Ai i kushtoi shtetit 572 780 euro dhe për këtë këtë rast nën hetim janë shtatë persona, të cilët dyshohen se e kanë keqpërdorur detyrën zyrtare.
Nga VMRO DPMNE prezantimin e veturës e quajtën shfaqje teatrale të ministrit Spasovski. /tesheshi.com/
