Kryeministri Rama ka pirë një tjetër “kafe të hidhur” te familja dibrane Rashaj, e cila humbi të birin Klodianin, 25-vjeçar, nga plumbat e një efektivi policor javë më parë.
Nevaldo Hajdaraj e qëlloi të riun në mesnatë, në rrethana ende të pasqaruara, teksa e ndoqi duke i kërkuar të ndalonte, pasi kishte shkelur orën policore.
Ka versione në qarkullim se e gjitha ka qenë aksidentale, por efektivi gjithsesi është akuzuar për tejkalim kompetencash dhe ndodhet pas hekurave.
E sotmja është e treta herë që shefi i qeverisë shkon në familjen Rasha, ndërkohë që një ditë më parë u vendos që asaj t’i lidhej një pension financiar pas humbjes së të birit.
Kujtojmë se ngjarja çoi në protesta të tjera të dhunshme kundër institucioneve dhe pronës publike, me prapavijë opozitare.
Pasojë e ngjarjes qe dhe dorëheqja e ministrit Sandër Lleshaj, ndërkohë që dhe ky i fundit, si dhe kryebashkiaku Veliaj, qenë për ngushëllim te Rashajt. Këta të fundit, ku veçon i ati, Qazimi, janë shprehur kundër protestave të dhunshme që në nisje të tyre, duke apeluar që të mos abuzohet me emrin e të dashurit të tyre të ndjerë. /tesheshi.com/
