Kryeministri Rama duket se është angazhuar në një betejë të re, atë me median, për t’a zhvlerësuar e ulur kredencialet e besueshmërisë.
Pas një replikimi të ashpër drejtpërdrejt me reporterët e parlamentit, ndaj të cilëve u tregua kritik deri dhe cinik, për mënyrën e raportimit dhe të bërit të pyetjeve, shefi i qeverisë shqiptare ka avancuar akoma dhe më tej.
Në një aktivitet të “Tirana Business Matching”, ai ka këshillar investitorët e huaj që mos i dëgjojnë gazetarët.
Me sugjerimin që kush ka ardhur sot t’i gëzohet këtij vendi të bekuar dhe me këshillën miqësore që as mos takoni gazetarë dhe as mos lexoni gazeta, sepse ju pengojnë gjithë aparatin tretës ju uroj mirëseardhjen dhe ju siguroj se kush investon sot në Shqipëri nuk do pendohet nesër dhe kush nguron sot, nesër do thotë si ka mundësi që ma morën radhën ca të tjerë përpara. Ky është momenti për t’i dhënë vetes shtytjen për të investuar në Shqipëri, është një vend që kthen shumë më tepër sesa jep, kur di t’i japësh aty ku duhet dhe ashtu si duhet”, ka thënë Rama. /tesheshi.com/
