Debate të ashpra në Parlament në lidhje me tarifimin e rrugës së Kombit. Pas fjalës së kryetares së LSI-së, Monika Kryemadhi e cila e quajti traun e pagesës së tarifës në rrugën e Kombit si demarkacioni Shqipëri-Kosovë, ishte kryeministri Rama që ndërhyri në debat. Sipas tij, nuk ka vend fjala taksim për rrugëne Kombit, por vendosje e tarifave për përdoruesit e rrugës.
Madje, për kryeministrin debati për këtë temë nuk ia vlen, por meqënëse kjo është përvoja e parë në Shqipëri ky tarifohet rruga, sipas tij, ia vlen shpjegimi.
“Vendimarrja për të vendosur tarifën e ka zanafillën në vitin 2010 kur kryeministri i kohës ka marrë iniciativën për të hapur këtë proces që tha ne e ndërtuam por për ta mirëmbajtur nuk e mirëmbajmë dot. Pamundësia e mirëmbajtjes ka sjellë degradime të mëdha”, tha ai.
“S’ka asgjë të pazakontë e të çuditshme. S’ka një mijë rrugë për rrugët, vetëm dy rrugë ka, ose për mirëmbajtjen e rrugëve paguajnë të gjithë taksapaguesit ose për mirëmbajtjen paguajnë të gjithë përdoruesit”.
Sipas tij, të ardhurat do të shkojnë për investime dhe për pjesët e papërfunduara. “ Do të kemi një Rrugë Kombi që nuk do të rrëshqasë më çdo stinë dhe nuk do bjerë guri nga lart dhe t’i bjerë në kokë ndonjë përdoruesi. Do të kemi 45 milionë euro të investuara vetëm në 4 vitet e para. Ashtu sikundër dhe 54 milionë euro të tjera, që në të gjithë harkun e viteve do të shkojnë për rehabilitim dhe mirëmbajtje”. /tesheshi.com/
