Kryeministri Rama realizoi të parin takim me homologun grek Kyriakos Mitsotakis, qyshse ky i fundit erdhi në pushtet pas zgjedhjeve të parakohshme të 7 korrikut, të cilat i dhanë fund qeverisjes Tcipras, me të cilin kabineti “Rama 1” u investua në një marrëveshje me karakter historik, gjë që ende nuk është finalizuar.
Takimi Rama – Mitsotakis ndodhi në Nju Jork, në kuadër të sesionit të 74 të asamblesë së Kombeve të Bashkuara. Dhe, sipas asaj çfarë raporton TCH, biseda mes tyre ka nisur me temën e tërmetit.
“Mitsotakis- Si është gjendja me tërmetin?
Rama- Për fat të mirë pa viktima. Por me shumë dëme. Nuk është e lehtë.
Mitsotakis- Ku ishte epiqendra e tërmetit?
Rama – Ishte në det 30 km nga Tirana. Ishte shumë i fuqishëm. Tani po bëjmë vlerësimin e gjendjes. Mund të nevojitet të trokasim në derën tuaj pas disa ditësh për ndihmë. E kemi bërë edhe më parë”, është dialogu i përcjellë nga TCH.
Më tej, mes tyre është diskutuar në lidhje me mbështetjen për hapjen e negociatave, pika më e ndjeshme me fqinjin në BE, i cili si kusht kërkon “të drejtat e minoritetit”, një teze e njohur tashmë e politikëbërjes së Athinës. /tesheshi.com/
