Kryeministri Rama avokoi sërish paketën Anti-Shpifje, kësaj here edhe si kryesues i OSBE-së, duke thënë se është pikërisht kjo organizatë, e cila, sipas tij e ka mbështetur atë ligjin e fortdiskutuar, votuar në parlament, e që pret dekretimin ose jo të Presidentit Meta.
“OSBE nuk e ka kritikuar ligjin, por ne kemi punuar me ta për një kohë të gjatë që të sigurohemi, që të sqarohemi.
Ligji që shkoi në parlament ka 100 përqind mbështetjen e OSBE-së dhe me standardet e saj që të gjejë zgjidhje me ato që ne po përjetojmë në mediat online.
OSBE është në harmoi të plotë për këtë ligj”, u shpreh Rama në një fjalë përmbyllëse në seancën e Këshillit të Përhershëm të OSBE-së.
Po aty, ai tha se ndihet krenar për riskun që ka marrë Shqipëria duke strehuar muxhahedinët iranianë. “Kemi marrë një risk me muxhahedinët. Jam krenar që ky risk është marrë përsipër. Politika shqiptare e ka bërë këtë hap me bindje të unifikuar.
Nga ana tjetër ne jemi anëtarë të NATO-s dhe çdo sulm mbi ne është mbi NATO-n, dhe për këdo që mund ta ketë imagjinaur përfshirjen thjesht si celebrim dhe jo angazhim do duhet të rikonceptojë atë që ka menduar.
Jetojmë në një botë ku përballemi me rreziqe, armiq të demokracisë, ne jemi në mbështetje të një aleance që lufton për një botë më të mirë”, theksoi ndër të tjera kryeministri shqiptar. /tesheshi.com/
