Me “një rrugë e dy punë”, për të ndjekur Carla Brunin në Butrint me të shoqëin Sarkozy, e vijuar fushatën, kryeministri Rama zbriti në jug, ku nga bashkia minoritare e Finiqit, deklaroi se 30 qershori do jetë një ditë e qetë dhe e zakonshme…zgjedhjesh.
“Në 30 qershor Shqipëria do bëjë zgjedhje. 30 qershori do jetë një ditë normale, edhe sikur të ketë shfaqje sporadike, apo orvatje të dëshpëruara pasi nuk do e bllokojnë dot procesin”, tha Rama, duke shtuar se “në 30 qershor zgjedhjet do bëhen në gjithë territorin e Shqipërisë. Përpjekje për të krijuar konflikte nuk ka, për ta kthyer Shqipërinë prapa nuk ka asnjë shans, sepse nuk ka popull. Kush i fryn zjarrit të dhunës, është i destinuar të tretet në atë zjarr. Nuk shans që në Shqipërinë e vitit 2019 të fitojë dhuna, kaosi, të fitojnë qorrat që nuk kanë asnjë ideal, ide që nuk kanë asgjë për të ofruar përveç vetes dhe hallit të tyre të madh të kthyer në një platformë dhune”.
Shefi i qeverisë përmendi dhe impresionet e ish-presidentit francez, gjatë vizitës së tij në Shqipëri.
“Sot përcolla Sarkozy dhe gruan e tij që dje këndoi në Butrint dhe janë të larguar të mahnitur nga Shqipëria, mes idesë që kishin dhe asaj që panë dhe mrekullive të bregdetit tonë këtu”, tha Rama. /tesheshi.com/
