Kryeministri Edi Rama prezantoi sot nismën e qeverisë për platformën online, e cila do të drejtohet nga ish-ministri i Brendshëm, Sajmir Tahiri, dhe që do t´i shërbejë qytetarëve për të denoncuar apo për t´u ankuar për punonjësit e administratës publike. Sipas Ramës, përmes kësaj platforme do të realizohet edhe ajo që quhet si bashkëqeverisje me qytetarët, por edhe do të largohen nëpunësit e korruptuar dhe parazitët.
Rama u ka drejtuar një apel qytetarëve që të regjistrohen dhe të denoncojnë çdo rast abuziv, pasi ankesat e tyre do të merren parasysh.
“Nuk është një faqe më shumë në internet, nuk është një portal, larg qoftë, por mekanizëm për ta shfrytëzuar për të gjitha aspektet, por edhe për sugjerime për çka mungon. Do u përgjigjem disa rezervave që kemi dëgjuar për këtë përpjekje të PS, që të ndërtojmë një koalicion real me njerëzit e zakonshëm. Keni dëgjuar që ky do të ishte kapërcim i parlamentit apo institucioneve të tjera. Por ky nuk ka asnjë bazë, pasi ky mekanizëm e forcon më shumë demokracinë, institucionet dhe Kuvendin. Nuk anashkalon asnjë mekanizëm kushtetues apo institucional.
Një rezervë tjetër që keni dëgjuar është që mund të hapë një gjueti shtrigash, pasi njerëzit mund të bëjnë denoncime. Por edhe kjo nuk qëndron, pasi platforma pranon vetëm anëtarë real me identitet të verifikuar si pjesëtar të këtij koalicioni, nuk është si Facebook, apo portale, që mund të futen me identitet të rremë. Çdo person që do të regjistrohet për të qenë pjesë e këtij procesi, do të mbajë përgjegjësinë e vet për atë që shkruan, pra do i dalë për zot çdo denoncimi për korrupsion apo sjellje abuzive. Një grup i tërë njerëzish do të ndjekin në kohë reale çdo kërkesë apo ankesë dhe do të bëjnë verifikimin të të gjithave ankesave, që lidhen me persona apo zyra”, tha Rama.
Sipas tij, për cdo çështje zgjidhja do të jepet nga titullari i institucionit dhe cdo anëtar i qeverisë do të mbajë përgjegjësi për çdo përgjigje.
Gjithashtu kjo platformë do të përfshijë edhe kryebashkiakët, të cilët do të përfshihen në këtë proçes përmes një marrëveshjeje.
“Në dritaren e ankesave, ka zgjedhje se ku do të drejtohet ankesa dhe në cilin institucion apo qark. Do ketë marrëveshje me kryebashkiakët që do të përfshihen në këtë proçes. Dhe njerëzit mund të ankohen qoftë për politikat, ligjet, apo padiskutim sjellje korruptive apo abuzive. Ata që kanë akses në këtë mekanizëm, janë anëtarë të regjistruar të këtij koalicioni. Mund të ankohen për diçka që ndodh në rrethin e tyre shoqëror dhe familjar, pasi figura e çdo anëtari është figurë përfaqësuese e koalicionit aty ku jeton dhe punon, shkollohet dhe studion. Ata që regjistrohen shprehin dëshirën që të marrin pr/vendimet para se të miratohen në qeveri, apo ato në proçes”, tha Rama. /tesheshi.com/
