Edi Rama edhe homologia e tij serbe Ana Brnabiç janë përplasur për Kosovën në Marok, gjatë një konference ndërkombëtare, por ndryshe nga eksperiencat me Aleksandër Vuçiçin, gruaja që drejton qeverinë serbe nuk i është përgjigjur Ramës ashpërsisht.
“Kosova është sot një Republikë. Është aty dhe funksionon si një shtet i pavarur, sovran, me institucionet e tij, dhe jam shumë i lumtur ta them, me një model shumë të admirueshëm respekti për minoritetet, para së gjithash për minoritetin serb, i cili ka përfaqësi në parlament, në qeveri. Bindja ime është, ka qenë gjithmonë dhe mbetet që, duke njohur Kosovën, Serbia do të bëjë një hap të madh përpara dhe do të lehtësohet nga një barrë e së kaluarës, e cila është pengesë për të parë drejt së ardhmes më e lehtësuar”, deklaroi Rama.
Kurse kryeministrja serbe i është përgjigjur me elegancë Ramës, duke deklaruar se “ne do të vazhdojmë të thellojmë bashkëpunimin me Shqipërinë, edhe pse kemi qëndrime të ndryshme në lidhje me shpalljen e njëanshme të pavarësisë së Kosovës. Në do të bëjmë më të mirën që të ecin përpara në thellimin e këtyre marrëdhënieve. Ne e kemi thënë gjithmonë se nëse njihet Kosova do të hapet kutia e Pandorës. E shikoni si po ndodh me Katalonjën?”, tha Brnabiç. /tesheshi.com/
