Gjatë një dëgjese publike në Korçë, kryeministri Rama tha se në 95 për qind të rasteve, ankesat nuk janë për çështje buxheti, por shteti. Sipas tij, njerëzit nuk po ankohen për të ardhurat, por për atë që iu takon me ligj nga shteti si shërbim, e që ata nuk e marrin dot. Kjo tha Rama, u sjellë aq stres, aq ngarkesë psikologjike, sa në një moment thonë “O Zot, më ruaj mend e kokës se do shkoj ta vras fare”, duke aluduar për nëpunës që nuk e kryejnë detyrën sic duhet ndaj qytetarit, që ndryshe quhen prej tij si çakej ose grabitqarë.
Rama tha se janë hasur raste kur një veteriner është emëruar drejtor hipoteke dhe kjo ka sjellë jo pak pasoja. “Ai është arsimuar për të therrur kafshë, e shkon e therr njerëz”, tha kryeministri.
Në një moment ai ironizoi dhe LSI-në, duke thënë, pa e përmendur me emër, “ishte një parti e vogël që erdhi dhe se u bë aq e madhe se më në fund plasi”. Komentet e Ramës u bënë teksa promovonte erën e re të të bërit shtet pa “tepsi” pushteti. /tesheshi.com/
