Kryeministri Edi Rama “denoncoi” një lloj “hipkorizie” apo padrejtësie të vendeve të zhvilluara kur është fjala për klimën. Nga Samiti Botëror i Veprimit për Klimën COP 28, i cili po zhvillohet në Dubai, ai tha “se
marrëveshja e Parisit ishte një rreze shprese, një premtim i bërë nga bota për të ruajtur planetin tonë dhe banorët e tij, e megjithatë realiteti është larg zotimeve të ndërmarra. Për ta thënë ashtu siç është, barra e aksionit për klimën vazhdon të bjerë në mënyrë shpërpjesëtimore në shpatullat e vendeve në zhvillim, pavarësisht kontributit tonë minimal në këtë krizë ndërkohë që ndotësit e mëdhenj bëjnë maksimumin e tyre për të na dhënë leksione, por jo për t’u ndalur vetë. Megjithatë ajo çfarë ne bëjmë, është ajo tek e cila besojmë dhe jemi zotuar të ulim emetimet e gazrave serrë në nivel global me 20.9% deri në 2030 dhe të arrijmë asnjanësinë klimatike deri në 2050”.
Ai veçoi faktin se Shqipëria është një prej vendeve të rralla që nuk ka emetime të dioksidit të karbonit nga prodhimi i energjisë.
“Sigurisht nga ana tjetër, përballet me një rrezik ekstrem hidrologjik sepse ne varemi nga klima edhe pse tashmë jemi në një diversifikim në shkallë të plotë me energjinë e erës dhe diellit. Së treti, Shqipëria ka ecur përpara me zbatimin e praktikave të zgjidhjeve bazuar në natyrë gjatë viteve të fundit dhe këtë vit Vjosa, i pagëzuari lum i fundit i egër i Europës është shpallur Park Kombëtar në Shqipëri. Ishte për të qeshur sidoqoftë, sepse më të mëdhenjtë e më të pasurit rreth nesh në Europë, që kanë zbutur të gjithë lumenjtë e tyre na dhanë leksione gjatë gjithë kohës se sa e rëndësishme ishte të kishim një lumë të egër në Europë, por s’ka rëndësi, të qeshësh është mirë dhe angazhimi ynë është i fortë dhe real ndaj ne e bëmë dhe jemi plotësisht të përkushtuar që të vazhdojmë kështu”, theksoi Rama.
Dhe si për të vijuar ta ketë mirë me Emiratet, një vend nga i cili Rama ka përfituar shumë e shpreson të përfitojë dhe më shumë, kryeministri u kujdes të thotë:
“Në fund më lini ta përmbyll me një përmendje të veçantë e të falenderoj nga zemra vendin mikpritës të kësaj ngjarjeje të madhe, Emiratet e Bashkuara Arabe dhe udhëheqjen e këtij vendi, Presidentin vizionar Mohammed bin Zayed i cili po i tregon bashkësisë sonë të vendeve çfarë do të thotë të lidhësh fjalët me veprat….”. /tesheshi.com/
