Kryeministri Edi Rama ka vijuar diskutimet me qytetarët për buxhetin e shtetit të vitit të ardhshëm në Lezhë, ku gjithashtu i pranishëm ka qenë edhe kryebashkiaku demokrat, Fran Frrokaj.
Rama shprehu bindjen se futja në skemën e TVSH-së të bizneseve të vogla është vendimi i duhur, që paratë që rikthehen përmes saj, të mos shkojnë në duart e një grushti njerëzish të pasur, por të përkthehen në investime për qytetarët.
Në këtë kuadër, kryeministri theksoi se aplikimi i TVSH-së në të gjithë shtresën e biznesit vendas do të luftojë edhe më shumë informalitetin në ekonomi.
“Vendosja e TVSH për biznesin e vogël, është një operacion i rëndësishëm kundër informalitetit. Opozita është pa argument në kundërshtimet e saj për këtë reformë dhe më vjen keq që është rreshtuar në mbrojtjen e informalitetit. Ne do ta çojmë deri në fund këtë reformë për më shumë të ardhura dhe për më shumë investime. Është e papranueshme që një pjesë e të ardhurave që duhet t’i shkojë mbrapsht njerëzve përmes TVSH, përfundojnë në xhepin e një grushti të pasurish. Ne përpiqemi të bëjmë politika të drejta dhe jo politika që mbështesin të fortët ndaj të varfërve, apo kompanitë e mëdha në dëm të biznesit të vogël apo të konsumatorët”, tha Rama.
Në vijim ai u ndal te reforma territorial, të cilën e cilësoi një sukses, por shtoi se i vinte keq që në vend që të reduktoheshin shpenzimet për pushtetin vendor, ato janë rritur.
“Nuk është çështje që e gjen vetëm në Bashkinë e Lezhës, porn ë të gjitha bashkitë e vendit, madje kjo është njëpërgjegjësi më e madhe e jona, pasi kemi edhe shumicën e bashkive në vend. Por është e paimagjinueshme që sot të kemi shpenzime më të larta se sa kishim më parë kur ishin mbi 300 komuna, veç bashkive. Kjo histori duhet të marrë fund, pasi është e papreçedentë që punësohen njerëz pa fund dhe paratë shkojnë për rroga. E dini se çfarë ndodh në portin e Durrësit? Ka aq shumë të punësuar, që nuk e kanë parë kurrë derën e institucionit që marrin rrogat, ndërkohë që këto para janë aq sa mund të përdoreshin qoftë edhe në Lezhë, për realizime projektesh”, tha Rama. /tesheshi.com/
