Gjatë një takimi elektoral në Gjirokastër, Rama ka folur mbi fabulën e “timonit”, të aktivizuar së fundi, si refuzim i të bashkëqeverisurit me LSI-në. Dhe për t’i ardhur në ndihmë “timonit që duhet drejtuar nga një palë duar”, pra vetëm nga PS-ja sipas tij, Rama solli shembullin e Bosnjës. Ai tha se Bosnja është një shtet federal me disa republika brenda, ku secila vepron më vete. Dhe kështu sipas tij është katandisur dhe Shqipëria, me disa republika ku siç tha, “në çatinë e secilës qëndron flamuri i një republike më vete”, të cilat janë partitë. “Këtë ministri e ka kjo parti, këtë inspektoriat e ka kjo partia tjetër…”. Por kështu nuk bëhet shteti sipas Ramës. “Provat janë dhënë”, tha ai, por që të shkohet më tej me këtë formë nuk është e mundur.
Aludimi ishte i qartë, për LSI-në, një parti tipike klienteliste, e cila ekziston nëpërmjet sigurimit të “punësimit në këmbim të votës”, në sektorët dhe dikasteret që ajo merr sa herë futet në koalicione qeverisëse, e reflektuar kjo dhe në katërvjetëshin me Berishën dhe në këtë të dytin me Ramën.
Sakaq, partisë së Ilir Metës i është kundërvënë fort këto ditë dhe kreut demokrat Basha, pasi në disa qarqe LSI ia ka marrë PD-së eksponentë të saj lokalë, duke iu dhuruar si këmbim vende pune, gjithnjë në administratë. /tesheshi.com/
