Kryeministri Rama ka zhvilluar së fundi një vizitë në Emiratet e Bashkuara Arabe, vendi i cili i dhuroi dikur kur ishte kryetar i Bashkisë së Tiranës, sasinë e nevojshme prej miliona eurosh për rikonstruksionin e sheshit “Skënderbej”.
Në njoftimin për shtyp rreth kësaj vizite në këtë vend sheikësh të Gjirit me begati financiare nga ari i zi, thuhet shkurt e thatë se “në një takim me lartësinë e tij Sheik Mohammed bin Rashid Al Maktoum-i, kryeministri theksoi gjatë takimit nevojën për të nxitur bashkëpunimin ekonomik mes dy vendeve, ndërsa ftoi sipërmarrësit nga Emiratet e Bashkuara Arabe që të investojnë në Shqipëri.”
“Turizmi dhe infrastruktura, sidomos portet detare, janë fushat që shihen më me interes mes dy vendeve. Gjithashtu, në takim të dy palët diskutuan edhe për mundësinë e vendosjes së një linje ajrore të Amirateve të Bashkuara që të lidhë dy vendet tona.”
Nuk është hera e parë që qeveritarët shqiptarë dhe veçanërisht Edi Rama, tentojnë t’ju bëjnë me sy vendeve arabe, ku veçohen Kuvajti dhe Emiratet, për investime në Shqipëri, të përkthyera dhe si ftesë për ndihmë.
Siç dihet, një kullë e lartë si pjesë e bulevardit të ri të Tiranës, do jetë një financim pikërisht nga Emiratet e Bashkuara Arabe. /tesheshi.com/
