Shefi i ekzekutivit shqiptar ka vlerësuar punën e kryebashkiakut të Devollit, i cili i përket PD-së, duke thënë se është frut i një bashkëpunimi pa ndasi partiake. “Pasqyrë e mirë e bashkëpunimit kjo, me Partinë Demokratike”, tha Rama duke inspektuar punimet për rehabilitimin urban.
Ndërsa kryebashkiaku demokrat, Nallbati iu drejtua me fjalët: “Punët e mira nuk ka nevojë për komente. Unë ju kam falënderuar që në çeljen e projektit. Uroj që të kemi të tjera bashkëpunime. Populli i Devollit ka nevojë për më shumë mbështetje”.
Sakaq, vlerësime të ngjashme për bashkëpunime mes dy kahjeve politike në pune dhe projekte lokale, janë dhënë dhe për kryebashkiakun e Tropojës e atë të Përmetit, gjithashtu demokratë. Ndërsa i pakënaqur Rama është shprehur ndaj kryebashkiakes së Shkodrës, Voltana Ademi, me të cilën ka përplasje të herëpashershme, si dhe me atë të Pogradecit, ku që të dy i quan të fjetur. Ndërsa ky vlerësim që vjen për kryebashkiakun e Devollit, përkon me marrëveshjen e arritur mes tij dhe kreut demokrat Basha, ku tashmë ngjajnë sikur gati do bashkëqeverisin. /tesheshi.com/
