Kryeministri Rama, në reagim të shpjegimeve të kryedemokratit Lulzim Basha ndaj akuzave për lobim në SHBA me ndihmën e Kremlinit, ka deklaruar se mishmashi siç e quan ai, do të zgjidhet deri në fund.
Në një postim në Facebook, Rama thotë se historia e financimit rus në PD do të zbardhet deri në fund për të mos lejuar që Shqipëria të merret peng.
“Që është një mishmash fundekrye korruptiv xhepash të errët, kjo nuk diskutohet sepse vetë mishmashi provohet edhe nga dy prononcime krejt të kundërta, në harkun e 3 muajve nga i zoti i mishmashit”, shkruan Rama. Ai shton se mishmashi është shkelje e hapur edhe me pasoja penale.
“Që është e habitshme që të gjenden disa rusë bujarë (dhe jo vetëm rusë) që të nxjerrin nga xhepat e tyre gjysëm milionë dollarë për një parti shqiptare, as kjo nuk diskutohet që e bën mishmashin edhe më skandaloz, ligjërisht e politikisht!
Por që kjo histori s’mund të mbyllet pa u zbardhur deri në fund, nëse ka apo jo, interferenca malinje forcash të huaja për ta përdorur opozitën shqiptare në funksion të cënimit të imazhit të Shqipërisë (drogëdrogëdrogëkrimkrimkrim), me qëllim pengimin e procesit të integrimit europian dhe destabilizimin e vendit, kjo është absolutisht e padiskutueshme!
Shqipëria nuk mund të merret dot peng nga askush dhe shqiptarët pa dallim partie, nuk e meritojnë këtë mishmash papërgjegjshmërie politike, ligjore dhe kombëtare”, shkruan Rama. /tesheshi.com/
