Kryeministri Rama sqaroi në parlament se përse Meta nuk mund të shkarkohet si president. Kjo, tha Rama, për shkak të asaj çfarë ka rekomanduar Komisioni i Venecias.
Sipas Ramës, Meta duhet shkarkuar, porse në respekt të Venecias kjo s’mund të ndodhë.
Kreu i mazhorancës pasoi paraqitjen e raportit për Metën paraqitur nga kreu i Komisionit Hetimor Ulsi Manja.
“Mund t’ju informoj për raportin që nuk e keni lexuar, ku ka nënvizuar Venecia një sërë shkeljesh të Metës, sa për dijeninë tuaj që këndoni po nuk lexoni. E zeza mbi të bardhë janë të nënvizuara shkeljet e presidentit.
Komisioni ka bërë një punë voluminoze dhe i ka adresuar të gjitha gjetjet.
Por edhe në këtë rast, është një tjetër mundësi për të parë dallimin mes nesh dhe gjithçkaje që thuhet në mënyrë keqdashëse për në.
Ne e kemi lexuar raportin e Venecias, dhe nuk e kemi konsideruar asnjëherë si aneks por si pikë referimi, dhe përderisa komisioni thotë se shkeljet e bëra nuk janë mjaftueshëm të rënda për shkarkim, atëherë ne kemi parë konstatimet e Komisionit që nuk na rekomandon të shkarkojmë Metën por na rekomandon të marrim masa për të ardhmen që të kufizojmë hapësirën e abuzimit nga presidentët”, tha shefi i qeverisë.
Para tij, kreu i Komisionit Hetimor për shkarkimin e Metës, Ulsi Manja, tha se shkeljet e Kushtetutës nga ana e kreut të shtetit janë të qarta, por që s’çojnë dot në shkarkim.
“Arrijmë në përfundim se dekrekti i Metës 10/6/2011 për shfuqizimin e dekretit për caktimin e datës së zgjedhjeve vendore si dhe dekreti në 13/12/2011 për emërimin e Marsida Xhaferllarit në Kushtetuese janë akte dhe vendime antikushtetuese.
Shkeljet e Presidentit dhe pasojat që ato kanë sjellë, duke mbajtur në konsideratë rolin e tij janë shkelje që nuk cojnë në domosdoshmërisht në shkarkim por diktojnë marrjen e masave të menjëhershme për plotësimin e kuadrit ligjor me mekanizma të qartë për të evituar situata bllokuese në të ardhmen”, tha Manja. /tesheshi.com/
