Kryeministri Rama foli ashpër kundër lirimit të eksponentëve të njohur të krimit, një fenomen nga i cili ai po merr faturë të rëndë politike, duke ia mveshur këtë njerëzvë të korruptuar ende në drejtësi.
Ai e tha këtë para një njësie speciale e cila do futet në veprim për të ashtuquajturën “Anti-KÇK”.
“Persona me dënim të përjetshëm dalin për të punuar në komunitet. Më vjen mirë që ndërkohë që na duhet të gjithëve, ju të parëve, por edhe ne të vuajmë fyerjet dhe lëndimet nga vendimet e gjykatësve sikur ishte rasti i fundit i gjyqtares pa tru, pa sy, pa veshë dhe zemër por vetëm me xhep që kanë sjellë lirime monstrash. Ndërkohë që sot jemi të vetëdijshëm që do të vuajnë akoma se janë akoma gjyqtarë dhe prokurorë që e dinë se nuk do ta kalojnë vettingun dhe jetojnë nën togën e zezë sikur të ishte dita e fundit e pazarit të madh të gjësë së gjallë, me moton “kap ca të kapësh”.
Edhe për ta kjo paketë ka një ilaç. Edhe ata, edhe këtë ua them juve këtu, do të përgjigjen në mos sot nesër, pasi një lloj si sot që erdhi koha të përgjigjen të fortët dhe të paprekshmit e këtij vendi për të gjitha pasuritë e tyre, do të vijë edhe për ata”, tha Rama.
Sipas tij, vettingu është vetëm hapi i parë i ndëshkimit për ata që kanë dreqosur drejtësinë.
“Vetingu nuk është gjykatë apo prokurori dhe nuk ka për detyrë të ndëshkojë ata që kanë vënë pasuri marramendëse duke e përdorur çekiçin për të thyer kafkën e drejtësisë, por është vetëm faza kur ndahet i njomi me të thatin dhe faza kur ata që nuk justifikojnë pasurinë largohen”, theksoi Rama.
Por shefi i qeverisë paralajmëroi masa të ashpra ndaj të korruptuarve në drejtësi, si dhe ndaj personave nën dyshime si njerëz aferash, duke thënë se “nga nesër, një letër do u drejtohet këtyre subjekteve dhe brenda 48 orëve do u kërkohet të plotësojnë kërkesat e formularit për burimin e pasurisë së tyre dhe pastaj formulari do të shkojë te SPAK-u dhe nga SPAK- u në gjykatë dhe ata do të duhet të vijnë para gjykatësit dhe të tregojnë sa fort kanë punuar tokën dhe sa shumë ullinj dhe portokalle kanë mbledhur, sa shumë vite kanë bërë roje natën në objekte, sa shumë janë lodhur dhe stërmundur në fasoneri, sa shumë kanë kursyer nga puna e tyre e stërndershme brenda apo jashtë vendit, nëse duan ti mbajnë ato pasuri, për ndryshe gjithcka që kanë sot, nesër do të jetë pronë e shtetit dhe në radhë të parë e policisë së shtetit. Kjo nuk do të vijojë si ato proceset ku në fund persona me burgim të përjetshëm dalin për të punuar në komunitet, por kjo ka afate. 48 orë formulari, deri në 15 ditë SPAK, deri në 15 ditë gjykata dhe pastaj lamtumirë prona e juaj, jo e imja, por e të gjithëve që e gëzojnë ata”, deklaroi Rama, që më pas shtoi se çfarë do u sekuestrohet do i kalojë shtetit.
“Dhe me pasuritë e tyre ne do të rrisim në radhë të parë rrogat tuaja, do të shërbejnë si burim për të shpërblyer punën tuaj, mbështetje për fëmijët e policëve të vrarë, do të mbështesim akademinë e sigurisë. Dhe me mjetet e tyre motorike ne do të shtojmë kapacitet motorike të policisë së shtetit, paketa anti-KÇK parashikon jo vetëm kaq, por edhe bllokimin e lëvizjes për jashtë shtetit, jashtë njësisë së tyre administrative, jo të nisen me autokolona makina luksoze dhe të shkojnë të nxjerrin pushkë në Himarë apo Dhërmi në mes të sezonit”, theksoi Rama. /tesheshi.com/
