Kryeministri Rama u takua me presidentin azerbajxhanas Ilham Alijev në Baku, duke i thënë atij se ishin të bekuar për fatin e dy vendeve që kishin një ndërmjetës si Turqia.
Rama e nisi fjalën e tij duke kujtuar luftën që la pas Azerbajxhani, atë me Armeninë, duke e fituar atë dhe rimarrë Nago-Karabakun, por dhe për paqen që po vendos me këtë vend.
“Është kënaqësi e madhe që gjendem këtu dhe pikë së pari, pas një fushate mjaft të madhe e të suksesshme për të rikthyer pjesë të vendit tuaj që për kaq shumë vite gjendej në një situatë që qe shndërruar në diçka të padurueshme, që të gjithë ne e dimë, qoftë në cilësinë e kryetarit të OSBE-së, dhe tanimë në cilësinë e anëtarit të Këshillit të Sigurimit. Shqipëria ka qenë, është dhe do të jetë plotësisht mbështetëse e Azerbajxhanit, e të vërtetës dhe të drejtës historike të Azerbajxhanit.
Po kështu, së fundmi në radhë, por jo nga rëndësia, ne përgëzojmë shumë përpjekjet tuaja të lavdueshme dhe shembullore për paqe dhe bashkëpunim afatgjatë me fqinjin tuaj, Armeninë. Në të njëjtën kohë, ne jemi të dy të bekuar të kemi një gur shumë të fortë midis nesh, që është Turqia, dhe unë besoj fort se ne mund të bëjmë më shumë, e ju e përmendët, në fusha të rritjes potenciale të bashkëpunimit tonë dhe sigurisht, pres me shumë padurim që të dëgjoj dhe të shoh perspektivat dhe çfarë kanë arritur ekipet tona, qoftë në sektorin e energjisë ashtu dhe të turizmit.
Ashtu siç jua kam thënë disa herë, ne kemi disi të drejtën tonë për të qenë xhelozë për Malin e Zi, sepse aty, ju keni bërë një investim masiv, jo thjesht në kuptimin financiar, por edhe modelin që është dhe shpresoj që ju do të bëni të njëjtën gjë”, tha i pari i qeverisë shqiptare.
Nga ana e tij, Alijev kërkoi dhe një bashkëpunim edhe më tej se energjia, ku theksoi turizmin.
“Ky është një sektor shumë i mirë i bashkëpunimit tonë që ka potencial të madh për t’u rritur. Përfaqësuesit tanë po zhvillojnë takime mbi portofolin më të gjerë të bashkëpunimit tonë në fushën e energjetikes, që përfshin gazin natyror, furnizimet tranzite dhe energjinë elektrike. Është vërtetë një pjesë mjaft e madhe e axhendës tonë dypalëshe.
Po kështu, mendoj që ka një shans të mirë për të folur për të tjera fusha të ndërsjellta, mundësitë në fushën e turizmit e t’u ofrojmë qytetarëve tanë mundësi të ndryshme turistike dhe përgjithësisht një partneritet më të gjerë për t’i dhënë një nxitje të mëtejshme e për të pasur rezultate më të mira në të ardhmen”, tha Ilham Aliyev.
Kujtojmë se Rama dhe Alijev janë afruar me njëri-tjetrin nga ndërmjetësia e presidentit Erdogan.
Pas Azerbajxhanit, Rama kalon në Turqi për një takim të radhës me Erdoganin. /tesheshi.com/
