Kryeministri Rama, i dhënë pas teknologjisë, kumtoi një tjetër objektiv: robotë në mjekësi.
“Po punojmë me ministren për të sjellë robotë për operacionet që është një tjetër shkallë. Besoj shumë që kemi arsye të ndihemi të inkurajuar dhe optimistë, dhe pa diskutim që tani më shumë sesa dje, kur e thonim që shumë gjëra duheshin bërë për ta besuar, kemi shumë realitet për ta besuar plotësisht se Shqipëria e 2030 do jetë një vend me shërbim shëndetësor që do u krijojë shqiptarëve kushtet psikologjike të plota për të mos shkuar jashtë, përveç rasteve kur ka nevojë për operacione të superspecializuara”, tha i pari i qeverisjes, nën bindjen se pushteti i tij ka reformuar shërbimin shëndetësor.
Në një takim mbi autonominë shëndetësore, ai foli dhe mbi fenomenin e ikjeve të bluzave të bardha drejt Gjermanisë, duke u treguar moskokëçarës, pasi sipas tij, pikërisht autonomia do bëjë kthesën dhe në këtë drejtim.
“Shpërblim i mjekëve në bazë të meritës, interesi për të punuar do jetë më i lartë, konkurrenca më e fortë, kush do të shkojë në Gjermani të na marrë të keqen, jam i bindur që vitet e ardhshme do të shënojnë një kthesë edhe në këtë aspekt. Në vizitën që bëra në Mynih më kanë takuar disa mjekë shqiptar që punojnë atje, jo stazhier, por shumë të mirë të pozicionuar që më kanë shprehur interesimin që të kthehen dhe të punojnë në sistemin publik shqiptar, ka shumë arsye për ta bërë këtë”, tha Rama.
Ai vijoi duke thënë, në lidhje me realitetin gjerman të mjekëve shqiptarë atje: “Do ta përkufizoj vetëm me një fjalë që dëgjova nga ata, ku njëri prej tyre tha ‘Kam 12-13 vite në Gjermani, punoj në një nga spitalet më prestigjoze, kam të gjitha kushtet profesionale, paguhem njësoj si një mjek gjerman, por jam bosh dhe kur mendoj që ikën 14 vjet dhe kështu mund të ikin vitet e tjera dhe një ditë të bukur mund të gjendem në kushtet e pensionit, me kolegë që as nuk zihesh dot, atëherë kam frikë se do të kem një hall shumë të madh, kështu që dua të kthehem në Shqipëri’. Dhe kjo ndjenja e boshllëkut dhe shumë dije mund t’i vihet në shërbim vendit dhe mund të marrin mbrapsht disa kënaqësi që s’i marrin nga paga, këtë kuptova nga ata të tre”.
Dhe nga ana tjetër, kryeministri kumtoi tjetër rritje të pritshme pagash për sistemin shëndetësor. /tesheshi.com/
