Kryeministri Rama kritikoi Prishtinën zyrtare që po refuzon Shengenin rajonal, një ditë para se në Tiranë të jetë takimi i tretë i radhës mes kryeministrave Rama-Vuçiç-Zaev. Sipas Ramës, ky është një proces që ka dhe bekim amerikan.
”Do të vijnë nga SHBA. I dërguari special i SHBA-ve Mattheë Palmer më ka shkruar personalisht dhe më ka kërkuar dy ftesa zyrtare, sepse do të dërgojë dy persona të posaçëm nga departamenti i Shtetit në mbështetje të këtij procesi”.
Do të vijnë nga Komisioni Europian, akoma nuk kemi një konfirmim por do të jenë këtu, po ashtu nga Banka Europiane.
Do të vijnë të gjithë.
Por pse do jenë pjesëmarrës të gjithë?
“Sepse është një proces që e mbështesin të gjithë”, theksoi Rama në një intervistë për Zona e Debatit në Klan Kosova, duke vijuar qëndrimet kritike.
“Dhe nuk ka gjë më të gabuar sesa fitimtari (Kosova është fitimtare e luftës) të kthehet në humbës, të izolohet dhe të kërkojë madje edhe nga ne që jemi me mish e me shpirt bashkë që të izolohemi nga proceset që vetëm janë në funksion”, theksoi shefi i qeverisë shqiptare.
“Çështja e Kosovës në raport me Serbinë, nuk mund të zgjidhet me kërcitje dhëmbësh, vetizolim, apo duke viktimizuar Serbinë përmes tarifash që janë të vlefshme për sa kohë sa janë mjete, dhe janë skandaloze për sa kohë kthehen në qëllime. Por mund të zgjidhet vetëm duke folur. Nuk di unë ndonjë konflikt në këtë botë që zgjidhet pa folur. Natyrisht që t’i flet me kundërshtarin, me atë që deri dje ka qenë armiku yt”, theksoi Rama.
Nga ana tjetër, ai vlerësoi Policinë e Kosovës, pas kontributit të saj në pas-tërmet.
E kam thënë edhe më herët, unë nuk dua të bëjë një polici si të Francës apo Italisë, por si të Kosovës.
Policia e Kosovë është spektakël dhe kjo patjetër që është meritë e atyre njerëzve, po të ishte politika e Kosovës sa çereku i policisë së Kosovës, yhy…ku do të ishte Kosova?”, u shpreh Rama përballë gazetarit Baton Haxhiu. /tesheshi.com/
