Rama: Koalicioni me Bashën? Të shohim pas 25 qershorit; por nëse LSI del e para, iki nga politika

Edi Rama nuk ka përjashtuar mundësinë e një koalicioni të madh me PD-në pas zgjedhjeve, por ka deklaruar se çdo gjë pas 25 qershorit do të vijojë sipas vendimit që do të japin shqiptarët në zgjedhje.

Duke folur për Sokol Ballën në Top Story, Rama deklaroi “Këtë e vendosin njerëzit. Do të lexojmë votën dhe do të shikojmë nëse do të na japin përgjegjësi të plotë, apo do të na thonë se do ta shpërndajnë përgjegjësinë. Atëherë do të shikojmë dhe bëjmë të gjithë strategjinë tonë. Sot kërkojmë nga njerëzit jo më shumë sesa pushtet për vete, se të ishte kështu ne sot do të ishim pa kundërshtarë dhe do të merrnim 100 mandate më 18 qershor”.

Në mënyrë të prerë Rama ka deklaruar se nëse PS nuk del parti e parë, ai do të largohet fare nga politika.

“Rëndësi ka që sot jemi në fushatë dhe nëse PS nuk del forcë e parë, unë jap dorëheqjen nga Partia Socialiste, pra largohem nëse Petrit Vasili del forcë e pare”, deklaroi Rama, i cili theksoi se pakti me Partinë Demokratike do të vazhdojë edhe pas zgjedhjeve për të modernizuar shtetin.

Duke iu rikthyer natës së 17 majit, Rama e ka krahasuar grupimin e partive të vogla ndaj tij si ajo e Hrushovit në vitin 1960.

“Ne u përgatitëm për zgjedhje. Isha në Elbasan për një takim dhe as që e mendoja se në darkë do të takoja Lulzim Bashën në takimin e thërritur nga 81 parti, që u mblodhën për të thënë që “të gjithë e duan demokracinë, Edi Rama jo”. Unë shkova atje me një qëllim të qartë, që të takohesha me Lulzim Bashën dhe të diskutoja vetëm me të”, deklaroi Kryeministri, i cili e ka cilësuar si të pataktë batutën e Ilir Metës në Pukë që e ka krahasur atë me Bashën si me Tomy-n dhe Jerry-in. E ndër të tjera, ka denoncuar klientelizmin emblematik të LSI-së.

“Nuk është batutë për President, megjithatë e pranoj se edhe unë bëj batuta. Por LSI ka gjetur shesh duke forcuar veten në administratë. Madje në Berat ka larguar edhe socialistë nga puna, por kjo punë duhet të marrë fund”, deklaroi Rama. /tesheshi.com/