Kryeministri Edi Rama ka vijuar me provokimet ndaj kreut të opozitës Lulzim Basha në ditën kur duhej të mbaheshin zgjedhjet e pjesshme lokale në Kavajë. Në rrjetin social Facebook, ai ka publikuar një foto ironizuese që shfaq Bashën në një çadër kampingu dhe në të cilën shkruhet: “Lulzim Basha 2046, pylli i Bedenit (Kavajë)”.
Fotoja vjen në ditën kur realisht në Kavajë do të duheshin të mbaheshin zgjedhjet e pjesshme për kryetarin e Bashkisë, por që u anulluan pas tërheqjes nga Rama të kandidatit të PS. Vendimi u mor për shkak të protestës së paralajmëruar nga opozita ditën e zgjedhjeve.
Tërheqjen Rama e shoqëroi dhe me ultimatumin ndaj Bashës ku thoshte se zgjedhjet do të bëhen në 18 qershor dhe të hënën më 8 maj, “unë nuk jam më në dispozicion për Lulzim Bashën dhe PD-në, nëse deri të dielën, ata nuk bien dot dakord për ofertën, për ndryshimin e menjëhershëm të Kodit Zgjedhor, sipas rekomandimeve të ODIHR-it dhe zhbllokimin e Vetting-ut, natyrisht”. /tesheshi.com/
