Më anë të një statusi në FB, kryeministri Rama e ka ftuar sërish opozitën për dialog, madje duke shprehur gadishmërinë që kjo të ndodhë nën çadrën e saj, porse pa kushte. Dhe nga ana tjetër, shefi i ekzekutivit gati i përgjërohet opozitës që ta votojë Vetingun.
“Dialog për çdo çështje dhe pa kushte me opozitën, edhe tek çadra po të duan, po opozita nuk duhet të mbajë peng Drejtësinë dhe të ardhmen e këtij populli duke bllokuar Vetingun që çliron Shqipërinë, ekonominë, integrimin, punësimin, nga kthetrat e gjykatësve e prokurorëve të korruptuar”, shkruan Rama.
Ndërkohë, një ditë më parë, mes palëve u këmbyen mesazhe gadishmërie për t’u ulur në tryezë, ku opozita nuk e përmendi qeverinë teknike si kusht, por në orët e mbrëmjes gjithçka ndryshoi duke u kthyer në pikën zero. Opozita iu rikthye, sipas saj, kërkesës së panegociueshme, për qeveri teknike. /tesheshi.com/
