Siç informon Top Channel, kryeministri Rama ka thënë gjatë mbledhjes së kryesisë së PS-së, aty ku ka shpjeguar arsyet e zëvëndësimit të katër ministrave të kabintetit të tij, një fjali që është konsideruar e pazakontë.
“Çadrën e opozitën e duan ngrehur edhe disa të huaj jashtë vendit që nuk radhiten ndër miqtë më të mirë të Shqipërisë”, citohet të ketë thënë kreu i mazhorancës shqiptare.
Po për këtë ta ketë patur vallë? Për cilët të huaj? Aludohet se bëhet fjalë për rusët. Siç është vënë re gjatë gati tre javëve të protestës së opozitës, Rama ka patur një aleat të fortë kundër saj: faktorin perëndimor, Brukselin dhe Uashingtonin.
Nga ana tjetër, është përfolur se e vetmja e interesuar për të patur destabilitet politik në Ballkan, aty ku mund t’i “thyhen hundët” Perëndimit, është Rusia.
Nuk mund të thuhet se kjo e fundit sponsorizon drejtpërdrejt opozitën në aksionin e saj politik të pazakontë, porse ky aksion mendohet të shihet me “sy të mirë” nga Moska brenda interesave gjeopolitike. /tesheshi.com/
